Монгол-Польшийн бизнес форум Улаанбаатар хотноо зохион байгуулагдана
МҮХАҮТ-ын Ерөнхийлөгч О. Амартүвшин Бүгд Найрамдах Польш Улсаас Монгол Улсад суугаа Элчин сайд Кшыштоф Бойког хүлээн авч уулзав. Уулзалтаар МҮХАҮТ нь 2023 оны 4 дүгээр сарын 25-нд хоёр улсын бизнес форумыг Польшийн хөрөнгө оруулалт, худалдааны агентлагтай хамтран зохион байгуулахаар тохиролцлоо.
МҮХАҮТ-ын Ерөнхийлөгч О. Амартүвшин 2019 онд зохион байгуулагдсан Монгол-Польшийн бизнес форум амжилттай, үр дүнтэй болсныг дурдаад энэ онд болох форумын хамрах хүрээг өргөжүүлж, олон салбарын ААН-үүдийг хамруулах сонирхолтой байгаагаа илэрхийлэв. Түүнчлэн танхимын гишүүн байгууллагуудыг идэвхтэй хамруулахад анхаарч ажиллана гэлээ.
Элчин сайд Кшыштоф Бойко ЭСЯ-ны зүгээс тус форумыг бүхий л талаар дэмжиж ажиллахаа мэдэгдлээ. Мөн энэ үеэр МҮХАҮТ-ын Ерөнхийлөгч О. Амартүвшин Монгол Улсаас БНПУ-д суугаа ЭСЯ-тай хамтран 2023 оны 5 дугаар сард Польш Улсад барилга, хүнсний чиглэлээр дараагийн бизнес форумыг зохион байгуулахаар ажиллаж буйгаа дурдав.
