Монгол-Австрийн бизнес форумыг зохион байгууллаа
Монголын үндэсний худалдаа аж үйлдвэрийн танхимаас Австрийн эдийн засгийн танхим (WKO), Монгол улсаас Австри Улсад суугаа Элчин сайдын яамтай хамтран Монгол-Австрийн бизнес форумыг 2023 оны 3 дугаар сарын 20-ны өдөр амжилттай зохион байгууллаа.
Тус форумын нээлтийн үйл ажиллагаанд Австрийн эдийн засгийн танхимын Дэд ерөнхийлөгч Филипп Геди, Монгол Улсын Цахим хөгжил, харилцаа холбооны сайд Н.Учрал, Монгол Улсаас Бүгд найрамдах Австри Улсад суугаа Элчин сайд М.Цэнгэг, Австрийн Хөдөлмөр, эдийн засгийн яамны Захиргааны газрын дарга Франц Вессиг нар оролцов.
Мөн форумын үеэр МҮХАҮТ-ын дэргэдэх Бизнес академийн зөвлөх Д.Ерөө “Монгол улсын эдийн засгийн өнөөгийн байдал, бизнесийн боломжууд”, Австрийн талаас Австрийн эдийн засгийн танхимын Ази, далайн бүс хариуцсан менежер Кристина Шоссер “60 жилийн түүхт Монгол-Австрийн бизнес харилцаа” сэдвээр тус тус илтгэл тавилаа.
Бизнес форумд Монгол Улсаас нийт 6 аж ахуйн нэгжийн 11 төлөөлөгч оролцсон бол Австрийн талаас 30 гаруй аж ахуйн нэгж оролцож хоёр орны худалдаа, эдийн засгийн хамтын ажиллагааны талаар мэдээлэл солилцож, эрдэс баялаг, цахим боловсрол, эрүүл мэнд, хүнсний хангамж болон аюулгүй байдлыг сайжруулах, аялал жуулчлалын салбарын хамтын ажиллагааг өргөжүүлэх, байгаль орчинд ээлтэй, ухаалаг хотыг хөгжүүлэхэд хамтран ажиллах боломжийн талаар ажил хэрэгч хэлэлцүүлэг өрнүүллээ.
Монгол-Австрийн хамтын ажиллагааны зөвлөлийн үүсгэн байгуулагчид болох Ц.Хашбат, Э.Одонтуяа нар оролцож, зөвлөлийн үйл ажиллагаа болон хоёр улсын бизнесийн харилцаанд гарсан ололт, амжилтын тухай товч илтгэл танилцуулав.
Монгол Улсын бизнесийн төлөөллүүд ирэх өдрүүдэд Салцбург хот руу айлчилж тус хотын Эдийн засгийн танхим, Аялал жуулчлал, зочид буудлын менежментийн институттэй уулзалт хийж цаашдын хамтын ажиллагааг өргөжүүлэх хүрээнд санал солилцох юм.
