Сэтгүүлчид “Бизнесийн ёс зүй” сургалтад хамрагдлаа
МҮХАҮТ-ын дэргэдэх Бизнесийн ёс зүйн төвөөс “Бизнесийн ёс зүй: Сэтгүүлчдэд зориулсан сургалт”-ыг 3 дугаар сарын 17-нд зохион байгуулж, телевиз, сонин, вэб сайтын сэтгүүлч, редактор, чөлөөт сэтгүүлчдийн төлөөлөл нийт 20 сэтгүүлч оролцов.
Тус сургалтыг “Транспэрэнси Интернэшнл Монгол” ТББ – ын компанийн засаглал, комплаенсын чиглэлээр мэргэшсэн сургагч багш болон Хэвлэл мэдээллийн зөвлөлийн төслийн сургагч багш нар удирдан явуулж, Бизнесийн байгууллагын ёс зүй, комплаенсын болон сэтгүүл зүйд олон талын оролцоог ханган ажилласнаар хэрхэн ёс зүйтэй сэтгүүл зүйг бий болгох боломжуудын талаар мэдлэг, ойлголтоо баталгаажууллаа.
Сургалтад оролцогчид бодит кейс дасгалууд дээр хамтран бүлгээр ярилцаж, сургалтын агуулгатай холбоотой тухайн сэтгүүлч ажлын талбартаа хэрэгжүүлж буй бодит туршлагаа хуваалцаж санал солилцсон юм. Сургалтын төгсгөлд сэтгүүлчдийн зүгээс оролцоонд суурилсан, үр дүнтэй, өгөөжтэй, практикт чиглэсэн сургалт болсон талаар сэтгэгдлээ хуваалцсан юм.
Мөн бизнесийн байгууллагын ёс зүй, комплаенсын талаарх ойлголтыг бэхжүүлэхэд сэтгүүлчдийн зүгээс оруулах хувь нэмрийг нэмэгдүүлэх зорилгоор Бизнесийн ёс зүйн төвөөс зохион байгуулах хэвлэл мэдээллийн компанит ажлын хүрээнд сэтгүүлчдийн дунд шагналт уралдаан зарлах талаар харилцан санал солилцлоо.
Монгол Улс дахь бизнесийн ёс зүй, шударга байдлыг бэхжүүлэх, бизнесийн таатай орчныг дэмжих зорилгоор хэрэгжүүлж буй “Бизнесийн ёс зүй, шударга байдлыг бэхжүүлэх" төслийг “Рио Тинто Монгол” ХХК, МҮХАҮТ, Транспэрэнси Интернэшнл Монгол ТББ, МҮХАҮТ-ын дэргэдэх Бизнесийн Ёс Зүйн Төв хамтран хэрэгжүүлж байна. Бизнесийн ёс зүйн төв нь 2021 онд МҮХАҮТ-ын дэргэд байгуулагдсан бөгөөд Төслийн II шат эхэлсэнтэй холбоотой тус төвөөс удаа дараагийн сургалтууд, дугуй ширээний ярилцлага, уулзалт, хэлэлцүүлэг болон Бизнесийн Ёс Зүй, Комплаенсын Үндэсний II Форумыг зохион байгуулах зэрэг ажлууд хийхээр төлөвлөж байна.
