Кувейт - Монголын бизнес форум амжилттай зохион байгуулагдлаа
Монголын үндэсний худалдаа, аж үйлдвэрийн танхим, Кувейт Улсын худалдаа, аж үйлдвэрийн танхим, Кувейт Улс дахь Монгол Улсын Элчин сайдын яам хамтран “Кувейт - Монголын бизнес форум”-ыг 2023 оны 03 сарын 8-ны өдөр Кувейт хотноо зохион байгууллаа.
Бизнес форумд Монголын талаас Кувейт Улсад суугаа Элчин сайд П.Сэргэлэн, Монгол Улсын Ерөнхийлөгчийн гадаад бодлогын зөвлөх Э.Одбаяр, МҮХАҮТ-ын дарга Т.Дүүрэн, хувийн хэвшлийн 30 гаруй төлөөлөл оролцсон бол Кувейтийн талаас Кувейт Улсын ХАҮТ-ын дэд ерөнхийлөгч ноён Фахад Якуб Ал-Жоуан-аар ахлуулсан мөн тооны төлөөллүүд оролцлоо.
МҮХАҮТ-ын дарга Т.Дүүрэн Монгол Улсын эдийн засаг, гадаад худалдааны орчин нөхцөл, хөрөнгө оруулалтын төслүүдийн талаар танилцуулж, МҮХАҮТ нь Кувейтийн ХАҮТ-тай хамтын ажиллагааны хүрээнд хоёр улсын бизнес эрхлэгчдийн хамтын ажиллагааг нэмэгдүүлэхэд бүх талаар дэмжин ажиллахыг илэрхийллээ.
Бизнес форумын үеэр МҮХАҮТ, Кувейт Улсын ХАҮТ хамтын ажиллагааны санамж бичигт гарын үсэг зурсан юм. Тус санамж бичигт ХАҮТ-ууд хоёр улсын компани, ААН, бизнесүүд харилцаа холбоо тогтооход дэмжлэг үзүүлэх, тогтмол мэдээлэл солилцох, үндэсний, олон улсын үзэсгэлэн яармаг, хурал зөвлөгөөнд оролцоход хамтран ажиллах, худалдааны нөхцөл байдал, зах зээлийн судалгааг хийхэд хамтран ажиллах зэргийг тусгасан байна.
Бизнес форумын дараа Монголын талын оролцогч аж ахуйн нэгжүүд өөрсдийн бүтээгдэхүүн үйлчилгээгээ танилцуулах үзэсгэлэнг зохион байгуулж, оролцогчид нүүр тулсан уулзалтуудыг хийж, бизнесийн саналуудаа танилцуулж, үр дүнтэй хэлэлцээрүүдийг хийлээ.
Элчин сайд тус форумд хэлсэн үгэндээ, Кувейт Улс нь Булангийн хамтын ажиллагааны зөвлөлийн гишүүн орнуудаас Монгол улстай дипломат харилцаа тогтоосон анхны улс болохыг дурдаад, өнгөрсөн хугацаан дахь хоёр улсын улс төрийн найрсаг сайн харилцаа нь цаашдын эдийн засаг, худалдаа, хөрөнгө оруулалт, эрүүл мэнд, спорт, аялал жуулчлал, боловсрол, байгаль орчны хамтын ажиллагааны суурь болно гэдгийг онцоллоо. Мөн Кувейт Улсад суугаа Элчин сайдын яам нь Монгол Улсаас халал аргаар бэлтгэсэн мах экспортлох тал дээр онцгойлон анхаарч, Булангийн улс орнуудын стандарт шаардлагад нийцүүлэх, магадлан итгэмжлэх байгууллагаар баталгаажуулахаар ажиллаж байгааг мэдээллээ.
Түүнчлэн Монгол, Кувейт хоёр улс агаарын тээврийн хэлэлцээрт гарын үсэг зурсан бөгөөд агаарын шууд тээврийг эхлүүлснээр эдийн засаг, худалдаа, аялал жуулчлал, соёлын харилцаанд шинэ үүд хаалга нээгдэнэ гэдгийг тодотгов. Ерөнхийлөгчийн зөвлөх Э.Одбаяр энэ удаагийн арга хэмжээ нь хоёр талын худалдаа, эдийн засгийн, бизнес эрхлэгчид хоорондын хамтын ажиллагааг нэмэгдүүлэхэд чухал ач холбогдолтойг онцоллоо.
