"Катар-Монголын бизнес форум"-ыг зохион байгууллаа
Монголын үндэсний худалдаа, аж үйлдвэрийн танхим, Катар Улсын Худалдаа, аж үйлдвэрийн танхим, Монгол Улсаас Кувейт Улсад суугаа Элчин сайдын яамтай хамтран Катар-Монголын бизнес форумыг 2023 оны 03 дугаар сарын 6-ны өдөр зохион байгууллаа.
Тус арга хэмжээнд Монголын талаас Ерөнхийлөгийн Тамгын газрын дарга Я.Содбаатар, УИХ-ын гишүүн Д.Өнөрболор, Элчин сайд П.Сэргэлэн, Ерөнхийлөгчийн гадаад бодлогын зөвлөх Э.Одбаяр, МҮХАҮТ-ын дарга Т.Дүүрэн болон хувийн хэвшлийн аж ахуйн нэгжийн 20 гаруй төлөөлөл оролцлоо.
Катарын талаас Худалдаа, аж үйлдвэрийн танхимын Тэргүүн дэд ерөнхийлөгч ноён Мухамед бин Ахмад Твар Ал-Кувари-гаар ахлуулсан албаныхан, хувийн хэвшлийн аж ахуйн нэгжүүдийн төлөөллүүд оролцлоо.
Энэ онд Монгол, Катар хоёр улсын хооронд дипломат харилцаа тогтоосны 25 жилийн ой тохиож байгаа бөгөөд ойн хүрээнд бизнес форумыг зохион байгууллаа. Форумын үеэр МҮХАҮТ-ын дарга Т.Дүүрэн Монгол Улсын эдийн засаг, гадаад худалдаа, экспортын боломжууд, "Шинэ сэргэлт" -ийн бодлогын хүрээнд төлөвлөгдсөн томоохон төсөл хөтөлбөрийн талаар танилцуулга хийсэн юм.
Талууд хоёр талын эдийн засаг, худалдаа, бизнесийн салбарыг хөгжүүлэх өргөн боломж байгааг, үүнд Танхимуудын хамтын ажиллагаа, оролцоо чухал үүрэг гүйцэтгэхийг онцоллоо.
