МҮХАҮТ-д "Эх оронч худалдан авалт, үндэсний үйлдвэрлэл-2023" үзэсгэлэн зохион байгуулагдаж байна

Монгол Улсын Ерөнхийлөгчийн санаачилгаар зохион байгуулагдаж буй “Хүнс, хөдөө аж ахуйн салбарын баялаг бүтээгчдийн зөвлөгөөн”-ий хүрээнд "Эх оронч худалдан авалт, үндэсний үйлдвэрлэл-2023" үзэсгэлэн МҮХАҮТ-д эхэллээ.

Төрийн байгууллага, төрийн өмчит үйлдвэрийн газруудад бараа, бүтээгдэхүүн нийлүүлдэг дотоодын 80 гаруй үйлдвэрлэгч, жижиг, дунд үйлдвэрийг хөгжүүлэх сангаас зээл авсан 20 гаруй үйлдвэрлэл эрхлэгч үзэсгэлэнд оролцож, бараа бүтээгдэхүүнээ танилцуулж байна.

Монгол Улсын Ерөнхийлөгч У.Хүрэлсүх "Эх оронч худалдан авалт, үндэсний үйлдвэрлэл-2023" үзэсгэлэнгийн нээлтэд үг хэлж, үзэсгэлэнтэй танилцлаа.

МҮХАҮТ тус арга хэмжээний хамтран зохион байгуулагчаар оролцож байна.

Мөн үзэсгэлэнгийн үеэр ХХААХҮЯ, Татварын ерөнхий газар, ЖДҮГ, Төрийн худалдан авах ажиллагааны газар, СХЗГ зэрэг төрийн байгууллагууд төрийн худалдан авалт, стандарт, тохирлын баталгаажуулалт, татварын хөнгөлөлт, чөлөөлөлт болон хөнгөлөлттэй зээлд хамрагдах боломжийн талаар мэдээлэл өглөө.