Компанийн нийгмийн хариуцлага ба тогтвортой хөгжлийн зөвлөлийн гишүүдийн уулзалт болов
МҮХАҮТ-ын дэргэдэх Компанийн нийгмийн хариуцлага (КНХ) ба тогтвортой хөгжлийн зөвлөлийн гишүүдийн ээлжит уулзалт (2023.02.28) боллоо.
Уулзалтын эхэнд КНХ ба тогтвортой хөгжлийн зөвлөлийн дарга Ж.Сүнжидмаа НҮБ-ын Даян дэлхийн гэрээ, тус гэрээнд бизнесийн байгууллагууд хэрхэн элсэх талаар мэдээлэл өгөв. НҮБ-ын Даян дэлхийн гэрээ нь дэлхий даяарх бизнесийн тогтвортой байдал, нийгмийн хариуцлагын бодлогыг хэрэгжүүлэхэд түлхэц өгөх зорилгоор 2000 оноос хэрэгжиж буй томоохон санаачилга юм. МҮХАҮТ энэхүү санаачилгад 2006 онд нэгдэн, бизнесийн төлөөллийн гол байгууллагын хувьд Даян дэлхийн гэрээний үндсэн зорилтуудыг дэмжин ажиллаж байна.
Даян дэлхийн гэрээнд нэгдсэн Хаан банкны туршлагаас тус банкны Тогтвортой хөгжлийн мэргэжилтэн О.Билгүүн танилцуулав.
Уулзалтад оролцогчид Даян дэлхийн гэрээний Монгол дахь сүлжээг байгуулах, олон улсын энэхүү санаачилгад илүү идэвхтэй оролцох нь МҮХАҮТ-ын нийт гишүүд болон тус зөвлөлийн гишүүн компаниудын үйл ажиллагаанд өндөр ач холбогдолтой талаар ярилцаж, ажил хэрэг болгоход санал нэгджээ.
Мөн энэ үеэр ТЭСО Инвестмент ХХК-ийн Гүйцэтгэх захирал С.Эрдэнэбаяр "ТЭСО групп" ХХК-ийн үйл ажиллагааны талаар дэлгэрэнгүй танилцуулж, ТЭСО групп Даян дэлхийн гэрээнд нэгдэх хүсэлтэй байгааг илэрхийлэв.
Түүнчлэн зөвлөлийн дарга Ж. Сүнжидмаа ESG буюу “Байгаль орчин- нийгэм- засаглал”-ын талаар мэдээлэл өгч, зөвлөлийн гишүүд цаашид ESG буюу "байгаль орчин-нийгэм- засаглал"-ын асуудалд илүү анхаарч, хамтран ажиллахаар тогтлоо.