“Хариуцлагатай бизнес, шударга байдлын аргачлал хэвшүүлэх” сургалт зохион байгуулагдлаа

МҮХАҮТ-ын дэргэдэх Бизнесийн ёс зүйн төвөөс зохион байгуулсан сургалтад “АПУ” ХК, “Монголын Банк Бус Санхүүгийн Байгууллагуудын Холбоо”, “Нийслэлийн өмчит Улаанбаатар Хөрөнгө Оруулалт, Менежмент” ҮЦК, “Ай Ти Зон” ХХК, И Эм Консалтинг зэрэг компанийн төлөөлөл оролцов. Сургалт нь бизнесийн үйл ажиллагаа явуулахад тулгамддаг авлига, ашиг сонирхлын зөрчлийг тодорхойлох, тухайн нөхцөл үүсэх үед баримтлах бизнесийн ёс зүйн стандартыг хэвшүүлэх, олон улсын сайн жишгийг нэвтрүүлэх, практикт суурилсан мэдлэг, чадвар олгоход чиглэгдлээ. Мөн сургалтын өмнө оролцогчдоос асуумж авахад засаглал, комплаенс, шүгэл үлээх тогтолцооны талаар оролцогчдын дийлэнх нь хангалттай мэдэхгүй гэж хариулсан бол сургалтын дараах асуумжид хариулахдаа засаглал, комплаенс, шүгэл үлээх тогтолцооны талаарх ойлголт сайжирсан гэж үзсэн байна.

Түүнчлэн, оролцогчдоос одоогоор байгууллагад нь хэрэгжиж буй бодлого журмын талаар асуухад компанийн дүрэм, засаглалын бодлогын баримт бичиг, ёс зүйн дүрэм /ажилтан, байгууллага/, хөдөлмөрийн дотоод журам, ажлын байрны тодорхойлолт зэрэг үндсэн баримт бичгүүд хэрэгжиж байгаа хэдий ч бэлэг өгөх авах тухай бодлого, шүгэл үлээх бодлого, авлигал хээл хахуулийн тухай бодлого, журам буюу комплаенсыг хэрэгжүүлэхэд шаардлагатай баримт бичгүүд бий болоогүй, дутагдалтай байгаа талаар хариулжээ.

Тиймээс аж ахуйн нэгжүүд, байгууллагуудад хэрэгцээ шаардлагатай дээрх бодлого журмуудыг боловсруулах, хэрэгжүүлэхэд тулгамдаж буй саад бэрхшээлийн талаар дэлгэрүүлэн судлах шаардлагатай байгааг тус сургалтын үр дүн харуулж байна.