"Дэлхийн экспортыг дэмжих форум"-ыг зарлах нээлт боллоо
Олон улсын худалдааны төвөөс (ITC) жил бүр зохион байгуулдаг томоохон арга хэмжээний нэг болох Дэлхийн экспортын хөгжлийн форум (WEDF)-ын нээлт Женев хотноо 2023 оны 2 дугаар сарын 15-нд болж өндөрлөлөө.
Энэ оны форум (WEDF)-ийг Монгол Улсын Засгийн газартай хамтран “Ногоон худалдааг төрөлжүүлье: Органик, Дижитал, Тогтвортой” сэдвээр энэ оны 6 дугаар сарын 26-29-ний өдрүүдэд Улаанбаатар хотноо зохион байгуулах бөгөөд ЖДҮ, эмэгтэй бизнес эрхлэгчид, залуу бизнес эрхлэгчид, олон улсын байгууллагуудын дуу хоолойг нэгтгэхээрээ онцлог юм.
"Дэлхийн экспортыг дэмжих форум"-ыг зарлах нээлтийн ажиллагаанд МҮХАҮТ-ын Ерөнхий нарийн бичгийн дарга С.Баясгалан цахимаар оролцож, “Дэлхийн экспортын хөгжлийн форум (WEDF)-ын түншүүд болон оролцогчдод зориулсан бизнесийн боломжууд” сэдвээр үг хэллээ. Тэрээр хэлсэн үгэндээ, Дэлхийн экспортын хөгжлийн форум нь манай улсын хувьд цар тахлын дараах эдийн засгийг сэргээх, худалдаа, экспортыг нэмэгдүүлэхэд чухал ач холбогдолтойг тэмдэглээд, форумын онцлох нэг чиглэл нь эмэгтэй бизнес эрхлэгчдийг дэмжих явдал бөгөөд эмэгтэй бизнес эрхлэгчдийг дэмжсэнээр эдийн засгийн өсөлт, жендерийн тэгш байдлыг хангахад хувь нэмрээ оруулж чадна гэв. Мөн Монгол Улсад залуучуудын тоо өсөж байгаа энэ үед тэдний чадавхыг ашиглаж, эдийн засгийн өсөлтийг хангах шинэлэг санаачилгуудыг хэрэгжүүлэх онцгой боломж бидэнд байна. Үүнийг нэмэгдүүлэхийн тулд дижитал технологиудыг ашиглах нь чухал гэдгийг тодотгосон юм.
МҮХАҮТ нь энэхүү форумын үеэр зохион байгуулагдах B2B уулзалтыг хариуцан зохион байгуулах бөгөөд ITC-ийн Эмэгтэй бизнес эрхлэгчдийг дэмжих "SheTrade" төслийн Монгол Улс дахь салбарыг МҮХАҮТ-ын дэргэд байгуулах бэлтгэл ажлыг ханган ажиллаж байна.
