Хойд Чүнгчонг мужийн эдийн засгийн чөлөөт бүс болон "LG" группийн гоо сайхны үйлдвэртэй танилцав

“Монгол-Солонгосын бизнес форум”-д оролцогчдыг Чүнгчонг мужийн Чүнгбук Эдийн Засгийн Чөлөөт Бүсийн Захиргааны зохицуулагч Күн Жэ Манг хүлээн авч уулзаж, чөлөөт бүсийн хэтийн төлөв болон Монгол Улстай хамтын ажиллагаа өрнүүлэх боломжуудын тухай санал солилцов. Тус чөлөөт бүс нь татварын хөнгөлөлт, санхүүгийн дэмжлэг, төрийн хатуу хяналт байхгүй зэрэг давуу талтайгаас гадна гадаадын иргэдэд боловсрол, эмчилгээ болон байрлах байраар хангаж өгдөг нь бизнес эрхлэгчдийг татах гол хөшүүрэг болдог аж.

Дэлхийд алдартай ”LG“ групп нь Whoo, SU:M, O Hui зэрэг гоо сайхны брендүүдийг хөгжүүлдэг бөгөөд Монголын төлөөлөгчид Хойд Чунгчонгт байрлах үйлдвэрээр нь зочилж, бүрэн автомат үйлдвэрлэл, сав баглаа боох технологитэй танилцлаа. Энэ үеэр Хойд Чүнгчонг мужийн захирагч өөрийн биеэр монголын төлөөлөгчдийг хүлээн авч уулзав.