Экспортын чиглэлээр үйл ажиллагаа явуулж буй компанийн төлөөллүүд хилийн худалдааны бүс, олон улсын хурал, үзэсгэлэнгийн төвтэй танилцав

МҮХАҮТ-ын дарга Т.Дүүрэн болон аж ахуйн нэгжийн төлөөлөгчид БНХАУ-ын ӨМӨЗО-ны Эрээн хотод ажиллах үеэрээ хилийн худалдааны бүсийг үзэж сонирхлоо. Үүний дараагаар Эрээн хотын олон улсын хурал, үзэсгэлэнгийн төвтэй танилцав. Тус төвд ирэх 6 дугаар сард Хятад-Монгол-Оросын эдийн засаг, хамтын ажиллагааны чуулга уулзалт, үзэсгэлэн зохион байгуулагдах юм. Уг төвд Олон улсын тосон будгийн уран зургийн галерей ажиллаж буй бөгөөд Монгол зураачдын бүтээлийг үзэх, таалагдсан бүтээлээ худалдан авах боломжийг бүрдүүлжээ.

Хилийн худалдааны бүсийн Бараа бүтээгдэхүүний үзэсгэлэн, худалдаа үйлчилгээний төв болон "Монгол хот" дэлгүүрийг төлөөлөгчид үзэж сонирхлоо. Монгол Улсаас гадна Солонгос, Казахстан зэрэг нийт 15 улсын хүнс, хувцас, гоо сайхан, эрүүл мэндийн бүтээгдэхүүнийг “Монгол хот” платформд байрлуулан, бусад дэлгүүр, худалдааны төв, цахим худалдаагаар дамжуулж Хөх хот, Бээжин, Шанхай, Гуан жоу зэрэг хотод борлуулалт хийх аж. Тус дэлгүүрт Монголд үйлдвэрлэгдсэн бараа бүтээгдэхүүнүүд худалдаалагдаж байна.

Гадаад худалдаанд тээвэр, логистик чухал үүрэгтэй оролцдог. Экспортын чиглэлээр үйл ажиллагаа явуулж буй компанийн төлөөллүүд Монгол Улс руу ачаа тээвэрлэлт хийдэг Хуан Уи логистикийн паркийн үйл ажиллагаатай танилцав. Хил нээгдэж, ачаа тээвэрлэлт саадгүй, хурдтай болсныг албаныхан энэ үеэр онцолж байлаа.