Улаанбаатар хотын нийтийн тээвэрт Бүгд Найрамдах Узбекистан Улсын “Самавто” компанийн SAZ LE60 маркийн автобусаа хүлээлгэн өглөө
МҮХАҮТ-ын санаачилгаар Улаанбаатар хотын нийтийн тээвэрт Бүгд Найрамдах Узбекистан Улсын "СамАвто" компанийн SAZ LE60 маркийн автобусыг хүлээлгэн өгөх ёслолын ажиллагаа боллоо. Тус арга хэмжээнд Монгол Улсын сайд, Нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар, МҮХАҮТ-ын Ерөнхийлөгч О.Амартүвшин, Нийслэлийн Засаг Даргын Ахлах Зөвлөх Д.Мөнх-Эрдэнэ, Нийслэлийн тээврийн газрын Дарга С.Жавхлантбаатар, Бүгд Найрамдах Узбекистан Улсын "СамАвто" компанийн Орлогч Захирал Ярашев Илхомжон Турканбоевич тэргүүтэй хүндэт зочид оролцлоо.
МҮХАҮТ-ын Ерөнхийлөгч О.Амартүвшин "Евро стандартад нийцсэн, үүгээр баталгаажсан автобусаар үйлчлүүлнэ гэдэг чухал. Нийслэл Улаанбаатар хотын тулгамдсан асуудал болоод байгаа автозамын түгжрэлийг бууруулахад нийтийн тээврийн салбарын шинэчлэл хамгийн их яригдаж байна. Энэ цаг үед "СамАвто" компани өөрийн автобусаа танилцуулж байна. Энэхүү үйл явдал нь нийтийн тээврийн шинэчлэлд томоохон хувь нэмэр оруулна гэж харж байна. Иргэдийн 90 гаруй хувь нь нийтийн тээвэрт сэтгэл ханамжгүй байна гэсэн судалгаа гарсан. Үүнийг өөрчлөхийн төлөө төр, хувийн хэвшлийн түншлэл, хамтын ажиллагаа зорих учиртай. 2022 оны 7 дугаар сард Бүгд Найрамдах Узбекистан Улсын “СамАвто” компанийн төлөөлөлтэй хийсэн уулзалтын үеэр тус компанийн үйл ажиллагааг Монголд таниулах, Улаанбаатар хотын нийтийн тээвэрт өөрсдийн үйлдвэрлэлийн SAZ LE60 маркийн автобусыг танилцуулан явуулах талаар тохиролцсон. Ийнхүү харилцан тохиролцсоны үр дүнд Монголын цаг уурын нөхцөл байдалд тусгайлан зориулж SAZ LE60 маркийн 2 автобусыг үйлдвэрлэн Нийслэлд хүлээлгэн өгч байна. Энэ бол дорвитой тусламж, бодит хамтын ажиллагаа. Том боломж нэг талаар олгож байна" гэв.
“СамАвто” компанийн үйлдвэрийн SAZ LE60 маркийн автобус өөрийн чанараа таниулж, нийтийн тээврийн ачааллыг бууруулах асуудалд хувь нэмрээ оруулах юм. Зургаан мэргэжилтэн үүнд анхаарч, цаг тухай бүрт нь засвар үйлчилгээг тогтмол хийж, Монголын нөхцөлд улам нийцүүлж, дараа дараагийн сайжруулалтыг хийх юм. Өнөөдрийн байдлаар Улаанбаатар хотын нийтийн тээврээр өдөрт 105 чиглэлд давхардсан тоогоор 500-600 мянган хүн үйлчлүүлдэг гэх тоон мэдээлэл бий.
“СамАвто" компанийн SAZ LE60 маркийн автобус нь 190 морины хүчин чадалтай, нэг удаад 56 зорчигч тээвэрлэх боломжтой, цонх нь цантдаггүй, шалнаасаа халдаг, Эйр кондишны нэгдсэн системтэй, шатахууны багтаамж нь 150 литр. Төв Азийн автобус үйлдвэрлэлийн зах зээлд "СамАвто" нь гол нийлүүлэгчдийн нэг юм. Үйлдвэрийн бүтээгдэхүүнээ дотоодын зах зээлээс гадна Гүрж, Казахстан, Кыргызстан, ОХУ, Тажикстан, Украин улс руу экспортолж ирсэн. SAZ LE60 маркийн автобус нь Евро стандартад нийцсэн, Японы ISUZU технологи, ноу-хау-г нэвтрүүлсэн. Тус корпорацийн хөдлөх эд анги, тоног төхөөрөмжийг суурилуулсан.
“СамАвто” компани нь “SAZ LE60” маркийн тус автобус нь Монгол Улсын байгаль цаг уур, хэрэглээний нөхцөлд нийцүүлэхээр тусгайлан үйлдвэрлэсэн гэдгээрээ онцлог. Чанартай, тав тухтай, хүртээмжтэй нийтийн тээврийн үйлчилгээг бий болгоход хувийн хэвшил санаачилгын эхлэл үүгээр тавигдаж байна. Монгол Улсын Засгийн газар төр, хувийн хэвшлийн түншлэлд онцгой ач холбогдол өгч байгаа. Хууль эрх зүйн орчин нь бүрдсэн” гэдгийг Монгол Улсын сайд, Нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар онцолсон юм.
Бүгд Найрамдах Узбекистан Улсын "СамАвто" компанийн Орлогч Захирал Ярашев Илхомжон Турканбоевич “Манай “СамАвто” компани нь сүүлийн 23 жилийн хугацаанд борлуулалтын зориулалттай техник буюу ачааны автомашин, автобус, пикаб машиныг үйлдвэрлэж эхэлсэн. Та бүхэнд танилцуулж байгаа SAZ LE60 маркийн автобус нь бидний олон жилийн судалгаа, туршлага дээр үндэслэн бий болсон бүтээгдэхүүн. Хоёр улсын худалдаа, хөрөнгө оруулалт, эдийн засгийн харилцаа хамтын ажиллагааг хөгжүүлэхэд энэ нь том алхам болно гэж найдаж байна” гэв.
