Бизнесийн эрх зүйн орчинг боловсронгуй болгох чиглэлээр хамтран ажиллана

Хууль зүй, дотоод хэргийн яам, Монголын Үндэсний Худалдаа Аж Үйлдвэрийн танхим хооронд хамтын ажиллагааг өргөжүүлэх, бизнес эрхлэх хууль, эрх зүйн таатай орчинг бий болгоход төр, хувийн хэвшлийн түншлэлийн тогтолцоог хөгжүүлэх зорилгоор Санамж бичиг байгуулж, Хууль зүй, дотоод хэргийн сайд Х.Нямбаатар, МҮХАҮТ-ын Ерөнхийлөгч О.Амартүвшин нар гарын үсэг зурлаа.

Хамтын ажиллагааны санамж бичгийн хүрээнд дараах чиглэлээр хамтран ажиллахаар тохиролцлоо. Тухайлбал,

• Засгийн газраас санаачлах эдийн засаг, бизнесийн эрх зүйн орчинг боловсронгуй болгохтой холбоотой хууль тогтоомжийн үзэл баримтлал болон хуулийн төсөл боловсруулах үе шатанд аж ахуй эрхлэгчдийн саналыг авах,
• Бизнесийн холбогдолтой хууль тогтоомж, захиргааны хэм хэмжээний актын хэрэгжилтэд хяналт шинжилгээ, үнэлгээ хийхдээ бизнес эрхлэгчдийн саналыг тогтмол авах, бизнес эрхлэгчдээс бизнесийн эрх зүйн орчинтой холбоотойгоор Танхимд ирүүлсэн санал, хүсэлтийг судлан шийдвэрлүүлэхэд хамтран ажиллах,
• Бизнесийн эрх зүйн орчныг боловсронгуй болгох чиглэлээр судалгаа, шинжилгээ хийж гүйцэтгэх, холбогдох байгууллагуудад танилцуулах
• Хөрөнгө оруулалт, бизнесийн холбогдолтой хууль тогтоомжийг бизнес эрхлэгч, олон нийтэд хүргэх, таниулах, сурталчлах ажлыг зохион байгуулахад тус тус хамтран ажиллах юм.

Түүнчлэн, хамтын ажиллагааны хүрээнд МҮХАҮТ-ын дэргэдэх Хууль зүйн бодлогын зөвлөлийн гишүүд бизнес эрхлэх орчинг сайжруулахтай холбоотой Хууль зүй, дотоод хэргийн яамнаас боловсруулж буй хуулийн төслүүдийн ажлын хэсгийн бүрэлдэхүүнд ажиллахаар тохиролцов.