МҮХАҮТ-ын дэргэдэх Хууль зүйн бодлогын зөвлөлийн 2023 оны эхний хурал зохион байгуулагдлаа
МҮХАҮТ-ын Хууль зүйн бодлогын зөвлөлийн хурал “Мобиком корпораци” ХХК-д болж, зөвлөлийн тэргүүлэгч гишүүн “Мобиком корпораци” ХХК-ийн хуулийн албаны захирал О.Өмөрбек хурлын эхэнд байгууллагынхаа үйл ажиллагааны бүтэц, зохион байгуулалтыг товч танилцуулав.
Зөвлөлийн хурлаар 2022 оны ажлын үр дүн, 2023 оны явуулах үйл ажиллагааны талаар санал солилцож, салбарын эрдэмтэн, судлаачдыг оролцуулсан “Өглөөний зочинтой уулзалт” арга хэмжээг сар бүр тогтмол зохион байгуулах, 2023 оны хоёрдугаар улиралд хувийн эрх зүй дэх тулгамдсан асуудлаар хуульчдын форум зохион байгуулахаар ярилцаж тогтов.
Мөн зөвлөлийн гишүүн компаниудын хууль эрх зүй хариуцсан нэгжийн үйл ажиллагаатай танилцаж, харилцан туршлага хуваалцах, олон улсын байгууллагуудаас хэрэгжүүлж буй төсөл, хөтөлбөрүүдэд хамрагдах болон гадаад хамтын ажиллагааг хөгжүүлэх чиглэлээр ажиллах нь зүйтэй гэж үзлээ.
МҮХАҮТ-ын дэргэдэх Хууль зүйн бодлогын зөвлөл нь 2018 оноос үйл ажиллагаагаа эхлүүлж, 2022 оны 9 дүгээр сард шинэчлэн байгуулагдсан бөгөөд бизнесийн орчинд тулгардаг нийтлэг асуудлын гарц шийдлийг олох, бизнес эрхлэх таатай орчныг бүрдүүлэхэд хувь нэмэр оруулах зорилготой ажилладаг. Зөвлөлийн бүрэлдэхүүнд аж ахуйн нэгжүүдийн хуулийн албаны захирлууд, ахлах хуульчид МУИС-ын Хууль зүйн сургуулийн профессор, Монголын Олон Улсын Арбитрын арбитрчид багтдаг бөгөөд энэхүү зөвлөлд МҮХАҮТ-ын гишүүн компаниудын хуулийн асуудал хариуцсан төлөөллүүдэд нээлттэй юм.