МҮХАҮТ "Эрдэнэс Монгол" ХХК-ийн нээлттэй сонгон шалгаруулалтын ярилцлагын шалгалтыг зохион байгуулж эхэллээ
“Эрдэнэс Монгол” ХХК-д ажлын байрны нээлттэй сонгон шалгаруулалт зарласан 71 ажлын байрны 88 орон тоонд давхардаагүй тоогоор 1215 иргэн сорилын шалгалт өгснөөс өндөр оноо авсан 434 иргэн ярилцлагын шалгалтад оролцож байна.
Нээлттэй сонгон шалгаруулалтын ярилцлагын шалгалтыг зохион байгуулах дэд ажлын хэсгийг МҮХАҮТ ахлан, 2023 оны 1 дүгээр сарын 30-наас 2 дугаар сарын 2-ны өдрүүдэд өөрийн байрандаа зохион байгуулж байна.
Ярилцлагыг тухайн салбарын мэргэшсэн, олон нийтэд хүлээн зөвшөөрөгдсөн эрдэмтэн, судлаачдаас бүрдсэн 3 гишүүнтэй 10 баг зэрэг авч буй бөгөөд Төрийн албаны зөвлөлийн жишиг тест болон олон улсын стандартад нийцсэн аргачлалаар шалгаруулах юм.
Ярилцлагын үйл явцад хөндлөнгийн шинжээчид хяналт тавин ажиллаж байна. Ярилцлага нь "Эрдэнэс Монгол" ХХК-ийн нөөц бүрдүүлэх нээлттэй ажлын байранд сонгон шалгаруулах сүүлийн шат. Сорилын болон ярилцлагын шатны шалгалтын нийлбэр дүнгээр хамгийн өндөр оноо авсан нэр дэвшигчдийг “Эрдэнэс Монгол” ХХК-ийн Гүйцэтгэх удирдлага сонгогдсон албан тушаалд томилно.
"Эрдэнэс Монгол” ХХК-ийн нээлттэй сонгон шалгаруулалтаас эхлэн цаашид төрийн өмчит компаниудад нээлттэй сонгон шалгаруулалтаар ажилд ордог шинэ жишиг бий болж байна.
