МҮХАҮТ-ын 42 төлөөлөгч 22 улсад ажиллаж байна
Монголын үндэсний худалдаа, аж үйлдвэрийн танхимын гадаад улс орнууд дахь төлөөлөгчдийн цахим хурал боллоо. Хурлыг МҮХАҮТ-ын Ерөнхий нарийн бичгийн дарга С.Баясгалан удирдан явууллаа. МҮХАҮТ нь гадаад улс, орнуудтай эдийн засаг, худалдаа, бизнесийн харилцааг хөгжүүлэх, бизнес эрхлэгчдийн түншлэлийг өргөжүүлэх зорилтын хүрээнд төлөөлөгч нарыг томилон ажиллуулж ирсэн.
МҮХАҮТ-ын 42 төлөөлөгч 22 улсад ажиллаж байна. Үүнээс 12 нь өргөмжит төлөөлөгчид буюу гадаадын иргэд.
Хурлын үеэр МҮХАҮТ-ын үйл ажиллагаа, үзүүлэх үйлчилгээний талаар, Засгийн газрын хуралдаанаар хэлэлцэн дэмжигдээд байгаа Танхимын тухай хуулийн шинэчилсэн найруулгын талаар болон худалдаа, эдийн засгийн өнөөгийн нөхцөл байдал, цаг үеийн мэдээллийн талаар төлөөлөгчдөд дэлгэрэнгүй танилцуулж, чөлөөтэй санал солилцлоо.
АНУ-ын Илиноис мужид 2022 оны 05 дугаар сард МҮХАҮТ-ын салбар танхим байгуулагдсан талаар Илиноис муж дахь төлөөлөгч У.Зоригтбаатар мэдээлэл хийлээ. Тус салбар танхим нь МҮХАҮТ-ын үйл ажиллагааг тухайн орон нутгийн бизнес эрхлэгчидтэй холбох, хамтран ажиллах, Америкийн бизнес эрхлэгчдэд Монгол Улсад хөрөнгө оруулалт хийх талаар мэдээлэл хүргэх, сурталчлах, Монголоос АНУ-д гарч ажиллах үндэсний аж ахуйн нэгжүүдийг дэмжих чиглэлээр үйл ажиллагаа явуулах юм. Мөн монголчуудад худалдааны харилцаатай холбоотой хуулийн зөвлөгөө өгөх, маргааныг шийдвэрлэхэд дэмжих чиглэлээр хуулийн фермүүдтэй хамтран ажиллана.
Бельгийн хаант улсын Брюссель хотод МҮХАҮТ-ын төлөөлөгчийн газар байгуулагдах бэлтгэл ажил мөн үргэлжилж байгаа бөгөөд тус салбар нь Монголын аж ахуйн нэгжүүд Европын зах зээлд нэвтрэх, холбоо тогтооход дэмжлэг, туслалцаа үзүүлэх чиг үүргийг хэрэгжүүлэх юм.
ХБНГУ-ын Нордраин-Вэстфолэн мужийн Эдийн засгийн яамны харьяа Хөрөнгө оруулалтыг дэмжих байгууллагын талаар болон МҮХАҮТ-тай хамтын ажиллагааг хөгжүүлэх боломжийн талаар тус муж улс дахь төлөөлөгч И.Оюун, Хөрөнгө оруулалтыг дэмжих байгууллагын ажилтан Э.Ариунсайхан нар танилцуулга хийлээ.
Хурлын үеэр төлөөлөгчид 2023 онд хийж гүйцэтгэх ажлын төлөвлөгөөгөө батлуулах, гэрээгээ шинэчлэн байгуулах, мөн шаардлагатай мэдээ, мэдээллээр авах зэрэг асуудлуудыг хэлэлцлээ.
