МҮХАҮТ-ын дэргэдэх Итгэмжлэгдсэн лабораториудын зөвлөлийн хурал болж, 2023 оны төлөвлөгөөгөө хэлэлцлээ

МҮХАҮТ-ын дэргэдэх Итгэмжлэгдсэн лабораториудын зөвлөлийн ээлжит хурал 2023 оны 01 дүгээр сарын 25-ны өдөр зохион байгуулагдав. Хурлын эхэнд МҮХАҮТ-ын Бодлого стратегийн газрын дарга Ж.Оюунчимэг Бодлогын өмгөөллийн үйл ажиллагаа, ойрын хугацаанд батлагдахаар хэлэлцэгдэж буй хууль болон бусад асуудлаар мэдээлэл хүргэлээ. Зөвлөлийн дарга Ж.Сайнбаяр 2022 оны ажлын тайлангаа танилцуулсны дараачаар 2023 оны үйл ажиллагааны төлөвлөгөөг хэлэлцлээ.

Хуралд Нийгмийн эрүүл мэндийн лавлагаа лаборатори, Ус сувгийн удирдах газрын лаборатори, Геологийн судалгаа шинжилгээний төв, Байгаль орчны хэмжил зүйн төв лаборатори, Зам тээврийн хөгжлийн төвийн лаборатори, АПУ ХХК, Тавин ус фарм ХХК, Гялс ХХК, Ногоон титэм ХХК, Монос хүнс ХХК, НИК ХХК, Магнай трейд ХХК, Говь ХК зэрэг 37 лабораторийн 50 орчим оролцогч оролцож, тус зөвлөлөөс 2023 онд дараах чиглэлээр илүү анхаарч ажиллах нь зүйтэй гэдэгт санал нэгдэв.

Үүнд:

• Салбарын боловсон хүчнийг чадавхжуулах үйл ажиллагаа зохион байгуулах,
• Химийн бодисын тусгай зөвшөөрөл авах үйл ажиллагааг лабораториудад хялбарчлах, зардлыг багасгах талаар БОАЖЯ-тай хамтран ажиллах,
• "Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай” хуульд нэмэлт өөрчлөлт оруулахаар дэд ажлын хэсэг байгуулагдан ажиллаж буйтай холбогдуулан саналыг дахин хүргүүлэх,
• Дэлхийн усны өдрийг тохиолдуулах 3 дугаар сард усны шинжилгээ гүйцэтгэдэг лабораториудад чиглэсэн сургалт семинар зохион байгуулах