“Хариуцлагатай бизнес, шударга байдлын аргачлал хэвшүүлэх” сургалт боллоо
МҮХАҮТ-ын дэргэдэх Бизнесийн ёс зүйн төв “Хариуцлагатай бизнес, шударга байдлын аргачлал хэвшүүлэх” сэдэвтэй сургалтыг 23-наас 24-ний өдрүүдэд зохион байгууллаа.
Тус сургалт нь бизнесийн үйл ажиллагаа явуулахад тулгамддаг авлига, ашиг сонирхлын зөрчлийг тодорхойлох, тухайн нөхцөл үүсэх үед баримтлах бизнесийн ёс зүйн стандартыг хэвшүүлэх, олон улсын сайн жишгийг нэвтрүүлэх, практикт суурилсан мэдлэг, чадвар олгоход чиглэгдсэн онцлогтой сургалт боллоо.
Сургалтад “Говь” ХК, “Скайтел” ХХК, “МИК”, “Инвескор ББСБ” ХК, “Макс Рөүдс” ХХК, “Капитрон” банк, АТГ зэрэг төр, хувийн хэвшил болон олон улсын байгууллагын төлөөлөл оролцсон ба байгууллагуудын төлөөллүүд бизнесийн ёс зүй, комплаенсын талаар мэдлэг ойлголтоо нэмэгдүүлэхийн зэрэгцээ байгууллагадаа хэрэгжүүлж буй бодит туршлагаа хуваалцан санал солилцов.
Монгол Улс дахь бизнесийн ёс зүй, шударга байдлыг бэхжүүлэх, бизнесийн таатай орчныг дэмжих зорилгоор хэрэгжүүлж буй “Бизнесийн ёс зүй, шударга байдлыг бэхжүүлэх" төслийг “Рио Тинто Монгол” ХХК, МҮХАҮТ, Транспэрэнси Интернэшнл Монгол ТББ, МҮХАҮТ-ын дэргэдэх Бизнесийн Ёс Зүйн Төв хамтран хэрэгжүүлж байна. Бизнесийн ёс зүйн төв нь 2021 онд МҮХАҮТ-ын дэргэд байгуулагдсан бөгөөд Төслийн II шат эхэлсэнтэй холбоотой тус төвөөс удаа дараагийн сургалтууд, дугуй ширээний ярилцлага, хэлэлцүүлэг болон Бизнесийн Ёс Зүй, Комплаенсын Үндэсний II Форумыг зохион байгуулах зэрэг ажлууд хийхээр төлөвлөж байна.
