Бизнес Академи “Харвард бизнесийн сургууль”-тай хамтын ажиллагаагаа өргөжүүлж байна
МҮХАҮТ-ын дэргэдэх Бизнес академийн захирал Д.Асралт “Харвард бизнесийн сургууль”-ийн захиалгат хөтөлбөр хариуцсан захирал Кларк болон профессор Форест Рейнхардтай уулзаж, 2023 онд үргэлжлүүлэн хамтран ажиллахаар тохиролцлоо.
Харвардын 122 хөтөлбөрт жилд дунджаар 13 мянган гаруй захирал суралцдаг байна. Бизнес Академи гүйцэтгэх удирдлагуудад зориулсан богино хугацааны, бизнесийн салбарын хамгийн сүүлийн үеийн мэдлэг, мэдээлэл олж авах, бодит кейс ажиллах, ижил түвшний манлайлагчдаас суралцах, нетворкинг хийх боломжтой хөтөлбөрүүдийг хэрэгжүүлэхэд хамтран ажиллахаар ярилцжээ. Мөн EXECUTIVE SUMMIT-2023 арга хэмжээг "Өөрчлөлтөөр манлайлъя" сэдвийн хүрээнд зохион байгуулахаар төлөвлөсөн байна.
Бизнес академиас "Ирээдүйн Хүнс Хөдөө аж ахуйн бизнес воркшоп" арга хэмжээг Харвард бизнес сургуультай хамтран 2023 оны 4 дүгээр сард зохион байгуулахаар тохиролцжээ. Энэхүү воркшоп, арга хэмжээ нь дэлхийн хүнсний ханган нийлүүлэлтийн сүлжээнд нэгдэх боломжийг тодорхойлох, хөдөө аж ахуйг бизнес талаас нь хөгжүүлэх, хөрөнгө оруулалт, үйлдвэрлэл, боловсруулалт, хадгалалт, тээвэрлэлт, худалдаа, маркетинг, хэрэглээ, шинэ техник технологи, биотехнологи, ХАА-н салбарт дижитал технологи нэвтрүүлэхэд суралцах, хамтран ажиллах, байгаль орчны нөлөөлөл, дипломат, геополитик улс төрийн нөлөө, тодорхой бус байдлыг үнэлэх, хүний нөөцийг бэлдэх зорилгын хүрээнд зохион байгуулагдах аж.