Монголын аюулгүй байдал, хамгаалалтын холбоод анхдугаар их хурлаа хийж байна

Монголын хамгаалалтын байгууллагуудын төв холбоо, Монголын хамгаалалтын байгууллагуудын холбоо, Монголын хамгаалалтын ажилтны холбоо, Монголын хамгаалагчдын эрхийг хамгаалах холбоо хамтран Монголын аюулгүй байдал, хамгаалалтын холбоодын анхдугаар их хурлыг зохион байгуулж байна. МҮХАҮТ нь хурлын дэмжигч байгууллагаар оролцсон бөгөөд МҮХАҮТ-ын Ерөнхийлөгч О.Амартүвшин нээлтэд оролцож, үг хэллээ.

“Монгол Улсад нийт 23764 төрийн бус байгууллага, холбоод бүртгэлтэй байдгаас үйл ажиллагаа явуулж байгаа нь 7749 байдаг. Нэг салбарт хэт олон ТББ үйл ажиллагаагаа тус тусдаа явуулж, өөр өөрийн байр суурийг илэрхийлж байгаа нь нэгдмэл байдлыг алдагдуулсан, тодорхой үр дүнгүй байна. Иймд харуул хамгаалалтын салбарын хууль эрх зүйн орчныг боловсронгуй болгох, салбарын ААН, албан хаагчдын эрх ашгийг хамгаалах, олон улсын туршлага, дэвшилтэт техник, технологи нэвтрүүлэх, сургалт судалгаа явуулах, нэгдсэн байр суурь, санал, санаачилга гаргах зорилгоор нэгтгэсэн мэргэжлийн холбоо байгуулан хамтран ажиллаж байгаад амжилт хүсье” гэлээ.

Мөн хэлсэн үгэндээ 2019 оны байдлаар Монгол Улсын нийт ажиллагсдын 0.3 хувь буюу 3.5 мянган хүн хувийн хамгаалалтын үйлчилгээний салбарт ажиллаж байна гэсэн Олон улсын хөдөлмөрийн байгууллагын судалгаа гарсан ч албан бус тоогоор 10 мянган хүн ажилладаг гэсэн салбарын бизнес эрхлэгчдийн тооцоолол байдаг. Салбарын нийт ажиллагсдын 78 хувийг 25-54 насны ажилтан, 87 хувь нь эрэгтэй ажилтан байна. 2009-2019 оны байдлаар энэ салбарт ажиллаж буй эрэгтэй ажилтан жилд дунджаар 7 хувь өсөж байгаа үзүүлэлттэй байна гэдгийг тодотгов.

Монголын аюулгүй байдал, хамгаалалтын холбоод анхдугаар их хурлаар холбооны дүрмээ баталж, Удирдах зөвлөл, Хяналтын зөвлөлөө сонгох бөгөөд Удирдах зөвлөл нь хуралдаж, ерөнхийлөгч, дэд ерөнхийлөгчөө сонгон, их хуралд зарлан мэдээлэх юм.