“Эмэгтэйчүүдийн эдийн засгийн чадавхыг бэхжүүлэх” хөтөлбөрийн дүнд 50 оролцогч бизнесээ эхлүүллээ

Азийн хөгжлийн банк, ХЗДХЯ, МҮХАҮТ хамтран хэрэгжүүлж буй “Эмэгтэйчүүдийн эдийн засгийн чадавхыг бэхжүүлэх хөтөлбөрийн хэрэгжилт, үр дүн” уулзалт боллоо. Уулзалтад МҮХАҮТ, Төсөл хэрэгжүүлэгч нэгж, оролцогчдын төлөөлөл оролцов.

МҮХАҮТ-ын Ерөнхийлөгч О.Амартүвшин МҮХАҮТ “Бизнес эрхлэгч эмэгтэйчүүдийн төв”-ийг Канад Улсын Засгийн газрын дэмжлэгтэйгээр байгуулсан бөгөөд эмэгтэйчүүдийн эдийн засгийн чадавхыг нэмэгдүүлэх, эмэгтэй бизнес эрхлэгчдийг дэмжих чиглэлээр олон талт үйл ажиллагааг явуулж байна. Цаашид бичил тэтгэлэгт хамрагдаж бизнесээ эхлүүлсэн Улаанбаатар хот болон орон нутгийн оролцогчдыг бизнесийн салбарт оролцоотой, манлайлалтай байлгахад дэмжиж, орон нутгийн салбар танхим болон бизнес эрхлэгч эмэгтэйчүүдийн зөвлөлийн үйл ажиллагаанд хамрагдуулан бойжуулж, дэмжин ажиллахаа илэрхийлж байна гэж уулзалтын үеэр хэлсэн үгэндээ онцоллоо.

Мөн төсөл хэрэгжүүлэгч зөвлөх багийн тайлантай танилцаж, оролцогч эмэгтэйчүүд амжилтын түүхээ хуваалцсан юм. Хөтөлбөрийн хүрээнд 2020 оны 10 дугаар сараас эхлэн хоёр жилийн хугацаанд Улаанбаатар хотын Налайх, Сонгинохайрхан дүүрэг болон Увс, Сүхбаатар, Сэлэнгэ аймгийн 240 гаруй эмэгтэйд хувь хүний хөгжил, хууль эрх зүй, бизнесийн төсөл боловсруулах арга зүй, менежмент, борлуулалт, маркетинг, санхүү, нягтлан бодох бүртгэлийн багц сургалтыг хоёр үе шаттай явуулжээ. Мөн бизнесийн санааг хэрэгжүүлэхэд зориулж, дээрх таван байршлын 50 эмэгтэйд 346 сая төгрөгийн бичил тэтгэлгийн санхүүжилтийг олгосон байна.

Оролцогчид хагас боловсруулсан хүнс, оёдлын цех, гахайн аж ахуй, үнэт эдлэлийн дархан, дайвар бүтээгдэхүүн үйлдвэрлэл, бариа заслын үйлчилгээ, талх нарийн боовны цех, гутал үйлдвэрлэл, хивс угаалга, цэвэрлэгээ, ноос ноолуур сүлжмэл үйлдвэрлэл, сүү цагаан идээ боловсруулах үйлдвэрлэлийн төслүүдийг бичиж санхүүжилт авчээ. Санхүүжилтээ тоног төхөөрөмж худалдан авах зэргээр бизнесээ эхлүүлж, тогтворжуулахад ашигласнаар өрхийн орлогоо нэмэгдүүлсэн байна.