"Энтрепренер аян"-ы хүрээнд "Эрдэнэт үйлдвэр"-ийн үйл ажиллагаатай аж ахуйн нэгжүүд танилцлаа
Монгол Улсын ТОП аж ахуйн нэгж болон МҮХАҮТ-ын Шилдэг аж ахуйн нэгж болох 20 гаруй компанийн төлөөлөл 2021 оны Шилдэг аж ахуйн нэгж, Монгол Улсын Баатар “Эрдэнэт үйлдвэр” ТӨҮГ-тэй танилцах аялалд оролцлоо. Аялал “Эрдэнэт үйлдвэр” ТӨҮГ-ын түүхэн замнал, онцгой үйл явдлыг илэрхийлэх 400 гаруй биет үзмэр хосолсон цуглуулга, сан хөмрөгтэй, зургаан танхим бүхий музейн үйл ажиллагаатай танилцахаас эхэлсэн юм. Монголын анхны цахим музейн төслийг 2020 онд эхлүүлж, 2021 онд ашиглалтад оруулсан байна. Уул уурхайн салбарын талаар ард иргэдэд үнэн зөв мэдээлэл олгох, Монголын уул уурхайн салбар түүний дотор “Эрдэнэт үйлдвэр”-ийн түүхэн хөгжлийг таниулах, сурталчлах зорилгоор тус музейг байгуулжээ. Өнөө жил Монгол Улсад орчин цагийн уул уурхайн салбар үүсэж хөгжсөний 100 жилийн ой тохиож буй.
ХХ зууны манлай бүтээн байгуулалт болох “Эрдэнэт үйлдвэр” 1978 оны 12 дугаар сарын 14-нд анхны баяжмалаа гаргаснаар түүхийн хуудас эргэж, уул уурхай дагасан, иж бүрэн дэд бүтэц бүхий Эрдэнэт хотыг цогцоор нь бүтээн босгосон. Энэ нь уул уурхайн томоохон төслийн сонгодог загвар, жишээ юм. Хөтөлбөрийн дагуу Орхон аймаг болон төвийн бүсийн ард иргэдэд эрүүл мэндийн үйлчилгээ үзүүлж буй оношилгоо, эмчилгээний “Эрдэнэт медикал” эмнэлгийн үйл ажиллагаатай танилцсан юм. Тус эмнэлгийн үйл ажиллагаа эрхэлсэн орлогч Л.Туул аялалд оролцогч аж ахуйн нэгжийн удирдлагуудад эмнэлгийн зохион байгуулалт, тоног төхөөрөмж, үйлчилгээний талаар дэлгэрэнгүй мэдээлэл өглөө.
“Эрдэнэт үйлдвэр”-ийн уурхайчид 2020 онд 32.5 сая тонн хүдэр боловсруулж, улс, орон нутгийн төсөвт 1 их наяд төгрөгийн төсөв төвлөрүүлсэн бол 2021 онд энэхүү амжилтаа ахиулж, 32.6 сая тонн хүдэр боловсруулж, 1.2 их наяд төгрөгийг төвлөрүүлсэн билээ. Тус үйлдвэрийн Ерөнхий инженер Т.Батмөнх аяллын оролцогчдын хүлээн авч, “Улаанбаатар хотоос зорин ирж Улсын баатар үйлдвэрийн үйл ажиллагаатай танилцаж байгаа Монгол Улсын ТОП аж ахуйн нэгж болон МҮХАҮТ-ын Шилдэг аж ахуйн нэгжийн төлөөлөл болсон та бүхэнд талархал илэрхийлье” хэмээн онцлоод “Эрдэнэт үйлдвэр” ТӨҮГ-ын үйл ажиллагаа, үйлдвэрийн технологийн шинэчлэл, хөрөнгө оруулалт, худалдан авалт, хэрэгжүүлж буй төсөл, хөтөлбөр, уурхайн ирээдүйн хөгжлийн талаар мэдээлэл өгч, асуулт хариулт өрнүүлсэн юм. “Эрдэнэт үйлдвэр” нь батлагдсан нөөцийн хүрээнд өнөөдрийн хүчин чадлаар цаашид 60-70 жил ажиллах боломжтой болсон төдийгүй нийгмийн хариуцлагын хүрээнд цөөнгүй төслийг амжилттай удирдан хэрэгжүүлж байна. Тухайлбал, 2500 хүний суудалтай Соёл, спортын “Эрдэнэт” цогцолбор, ажилтнуудаа орон сууцжуулах хөтөлбөрийн хүрээнд “Уурхайчин 1,2,3” орон сууцны төслийг эхлүүлж, эхний ээлжийн 391 айлын орон сууцыг өнгөрсөн онд ашиглалтад оруулжээ.
“Энтрепренерийн аян"-ы хүрээнд зохион байгуулсан энэ удаагийн аялал “Эрдэнэт үйлдвэр” ТӨҮГ-ын үйлдвэрлэлийн үндсэн цехүүд болон ил уурхайтай танилцах хөтөлбөрөөр цааш үргэлжилсэн юм. “Тэрбум мод” үндэсний хөдөлгөөнд нэгдсэн “Эрдэнэт үйлдвэр” 2031 он хүртэл 100 сая мод тарих үүрэг, амлалт авсан. Үүний хүрээнд Монгол Улсын анхны бүрэн автомат үйл ажиллагаатай ойн генетик нөөцийн “Эрдэнэт” төвийг энэ онд нээсэн юм. Энэхүү төвийн үйл ажиллагаатай Монгол Улсын ТОП аж ахуйн нэгж болон МҮХАҮТ-ын Шилдэг аж ахуйн нэгж 20 гаруй компанийн төлөөлөл танилцсан юм. МҮХАҮТ-ын Орлогч дарга Б.Намжилсүрэн "Монгол Улсын экспортын орлогын чухал эх үүсвэр, төсвийн орлогыг жил тутам бүрдүүлж ирэхэд онцгой үүрэг гүйцэтгэж буй "Эрдэнэт үйлдвэр"-тэй танилцах энэхүү аялалд манай шилдэг аж ахуйн нэгжүүд ихээхэн ач холбогдол өгч, өргөн бүрэлдэхүүнтэй оролцлоо. Үйлдвэрийн түүхэн замнал, хөгжил, үйлдвэрлэл, түүний онцлог, нийгмийн шинж чанартай төслүүд, уурхай дагасан хотын аж байдалтай мөн давхар танилцлаа. Харилцаа, хамтын ажиллагаагаа бэхжүүлэх, өргөтгөхөд энэхүү аялал чухал ач холбогдолтой байлаа” гэв. Аяллын төгсгөлд бизнесийн хамтын ажиллагаагаа улам гүнзгийрүүлэх, шинэ бүтээгдэхүүн, үйлчилгээгээ танилцуулах, түншлэх B2B уулзалтыг МҮХАҮТ, “Эрдэнэт үйлдвэр”-тэй хамтран зохион байгуулсан юм.
