Ази, Номхон далайн худалдаа, аж үйлдвэрийн танхимуудын холбоо (CACCI)-ны 36 дугаар хуралдаан боллоо
Ази, Номхон далайн худалдаа, аж үйлдвэрийн танхимуудын холбооны 36 дугаар хуралдаан Австрали Улсын Мелбоурн хотод 2022 оны 11 дүгээр сарын 28, 29-ний өдөр болж өнгөрлөө. Хуралдаанд тус Танхимуудын холбооны гишүүн 25 улс болон бие даасан эдийн засгийн худалдаа, аж үйлдвэрийн танхимуудын төлөөлөл, Монголын үндэсний худалдаа, аж үйлдвэрийн танхимыг төлөөлж Гадаад харилцаа, хамтын ажиллагааны газрын дарга Ц.Гэрэлсайхан, Үзэсгэлэн яармагийн газрын мэргэжилтэн Д.Ууганбаатар нар оролцов.
36 дугаар хуралдаан нь бүс нутгийн шилдэг бизнес эрхлэгчидтэй харилцаа холбоо тогтоох, мэдээлэл солилцох боломжийг олгосноос гадна олон улсад танигдсан судлаач, мэргэжилтнүүдийн илтгэлүүдээр дамжуулан дэлхий дахинд нүүрлээд буй Орос – Украины хямралт байдал, ковид-19 цар тахлын хүндрэлүүдийг тодорхойлон хэлэлцэх, тэдгээрийг даван гарах арга зам, хямралаас боломж руу шилжих талаар мэдээлэл өглөө.
Гадаад харилцаа, хамтын ажиллагааны газрын дарга Ц.Гэрэлсайхан тус хуралдааны Аялал жуулчлалын салбар хуралдаанд илтгэл тавьж, хэлэлцүүлэгт оролцсоноос гадна Монгол Улс 2023 онд Ази Номхон далайн худалдаа аж үйлдвэрийн танхимуудын холбоотой хамтран олон улсын хурал, зөвлөгөөнийг зохион байгуулах талаар холбооны удирдлагуудтай санал солилцлоо.
Ази Номхон далайн худалдаа аж үйлдвэрийн танхимуудын холбооны 36 дугаар хуралдааны үеэр тус холбооны зөвлөлийн 96 дугаар хурал болж, Холбооны шинэ ерөнхийлөгчийг зарлалаа. Дараагийн хоёр жилийн хугацаанд Ерөнхийлөгчөөр ажиллуулахаар тус танхимын дэд ерөнхийлөгч, The Good Business Foundation-ны үүсгэн байгуулагч Петер Макмуллин-ийг сонгосон байна.
