Монгол-Японы бизнес, хөрөнгө оруулалтыг нэмэгдүүлэхэд хамтран ажиллахаар санал солилцов
Япон Улсын Гадаад худалдааг дэмжих байгууллага (JETRO)-ын дарга Сасаки Нобүхико МҮХАҮТ-ын Ерөнхийлөгч О.Амартүвшин, дарга Т.Дүүрэн, Тамгын газрын дарга Б.Батболд, зөвлөх С.Алтанцэцэг нарыг хүлээн авч уулзлаа.
МҮХАҮТ нь Япон Улсын Гадаад худалдааг дэмжих байгууллага (JETRO)-тай хоёр улсын хоорондын бизнес хөрөнгө оруулалтыг нэмэгдүүлэх чиглэлээр нягт хамтран ажиллаж, төрөл бүрийн уулзалт, үзэсгэлэн арга хэмжээнүүдийг тогтмол зохион байгуулж ирсэн.
Уулзалтын үеэр хоёр байгууллагын харилцааг идэвхжүүлэх, хамтын ажиллагааны тогтвортой механизмыг бий болгоход анхаарах, харилцан мэдээлэл солилцох, туршлага судлах асуудлаар ярилцав. Мөн Монгол Улс Японы зах зээл рүү бараа бүтээгдэхүүнээ экспортлох боломжууд, Монгол-Японы бизнес форум, Япон Улсад Монголын экспортын бараа бүтээгдэхүүний үзэсгэлэнг зохион байгуулахаар хамтран ажиллах талаар харилцан санал солилцлоо.
