Бизнес эрхлэгч эмэгтэйчүүдтэй “Өглөөний цай” уулзалтыг зохион байгууллаа
Жендэрийн Үндэсний Хорооноос Тогтвортой хөгжлийн 5 дугаар зорилтод тусгагдсан шийдвэр гаргах түвшинд эмэгтэйчүүдийн оролцоог нэмэгдүүлэх, эмэгтэйчүүдийн эдийн засгийн чадавхийг сайжруулах хүрээнд салбартаа тэргүүлж буй бизнес эрхлэгч эмэгтэйчүүдтэй хамтран ажиллах санал солилцох уулзалтыг НҮБ-ын Хөгжлийн хөтөлбөрийн дэмжлэгээр МҮХАҮТ-тай хамтран зохион байгууллаа.
Тус уулзалтад МҮХАҮТ-ын Ерөнхий нарийн бичгийн дарга С.Баясгалан, Жендэрийн Үндэсний Хорооны нарийн бичгийн дарга бөгөөд Ажлын албаны дарга Т.Энхбаяр, НҮБ-ын Хөгжлийн хөтөлбөрийн суурин зохицуулагч Илейн Конкевич нар салбартаа тэргүүлж буй бизнес эрхлэгч эмэгтэйчүүдийн төлөөлөлтэй уулзан санал солилцлоо.
Жендэрийн тэгш байдал нь компанийн сайн засаглалын нэгэн үзүүлэлт болдог бөгөөд улс орнуудын бизнесийн манлайлагчид хүйсээр үл ялгаврлан ажиллах нөхцөлийг бүрдүүлэх, карьер хөгжлийн тэгш боломжийг олгоход хүчин чармайлт гаргаж байна. Жендэрийн тэгш байдлыг хангах нь үйл ажиллагааны үр ашгийг нэмэгдүүлэх, нөөц баялгийн үйлдвэрлэл, хуваарилалтын зарцуулалтыг илүү оновчтой болгох замаар эдийн засгийн өсөлтийг сайжруулах, ядуурлыг бууруулахад хувь нэмрээ оруулдаг бөгөөд үүнд бизнес эрхлэгч эмэгтэйчүүдийн манлайлал, хамтын ажиллагаа чухал үүрэгтэй юм.
