БНТУ-ын Олон Улсын Эдийн засгийн харилцааны зөвлөл /DEIK/-тэй хамтран Монгол-Туркийн В2В арга хэмжээг зохион байгууллаа

Монголын үндэсний худалдаа, аж үйлдвэрийн танхимаас бизнесийн хамтын ажиллагааны боломжуудыг бий болгох зорилгоор Бүгд Найрамдах Турк улсад зохион байгуулсан "Бизнес форум"-ын хүрээнд Монголын аж ахуйн нэгжүүдийн төлөөлөл, бизнес эрхлэгчдийг БНТУ-ын Олон Улсын Эдийн засгийн харилцааны зөвлөл, Станбул хотын Худалдааны танхимын гишүүдтэй уулзуулах В2В арга хэмжээг зохион байгуулав. Уулзалтад Олон улсын эдийн засгийн харилцааны зөвлөлийн Монгол-Туркийн зөвлөлийн дэд тэргүүн Чингиз Гул, Евроазийн бизнес зөвлөлүүдийн чиглүүлэгч Тугба Бал Бахар, Монгол Улсаас БНТУ-ын Станбул хотод суугаа Ерөнхий консул Ш.Хишигсүрэн нар оролцож, арга хэмжээг нээж үг хэллээ.

Монголын талаас худалдаа, тээвэр логистик, барилга, аялал жуулчлал, хүнс, хөдөө аж ахуй, гоо сайхны чиглэлээр үйл ажиллагаа явуулдаг 20 орчим компани, Туркийн талаас мөн адил салбарын 30 орчим компани уулзалтад оролцов.

В2В уулзалтын үеэр МҮХАҮТ-ын төлөөлөгчид Олон улсын эдийн засгийн харилцааны зөвлөлийн Монгол-Туркийн зөвлөлийн дэд тэргүүн Чингиз Гултэй уулзаж Танхимын зүгээс цаашдаа Турк-Монголын бизнесийн хамтын ажиллагааг нэмэгдүүлэхээр дараах ажлуудыг хийхээр төлөвлөлөө. Үүнд:

• Монгол Улсын хөдөө аж ахуйн салбарт хамтран ажиллаж арьс шир, малын гаралтай бараа бүтээгдэхүүнүүдийг үйлдвэрлэх, хамтарч хөрөнгө оруулах чиглэлээр Монгол Улсад 11 дүгээр сард уулзалт зохион байгуулах,
• Туркийн эрүүл мэндийн аялал жуулчлалыг Монгол Улсад таниулах, сурталчлах, бизнес эрхлэгчдийн хооронд хамтын ажиллагааг өргөжүүлэх чиглэлээр цахим хурлууд зохион байгуулах,
• Монгол Улсын эдийн засгийн чөлөөт бүсүүдийг хөгжүүлэх, эдийн засгийн чөлөөт бүсэд гадаадын хөрөнгө оруулалтыг татах чиглэлээр Турк Улсын чөлөөт бүсүүдийн туршлага судлах, Турк Улсын чөлөөт бүсийн хөрөнгө оруулагч бизнес эрхлэгчдийг Монголын чөлөөт бүсүүдэд хөрөнгө оруулах боломжуудыг танилцуулах,
• Туркийн аж үйлдвэржсэн хотуудад Монгол, Туркийн бизнесийн хамтын ажиллагааг өргөжүүлэх арга хэмжээг цаашдаа шат дараатайгаар хамтарч зохион байгуулахаар тогтлоо.