Ирэх онд Финландын талтай хамтран худалдаа, эдийн засгийн хамтын ажиллагааг өргөжүүлэх арга хэмжээг зохион байгуулна
Финланд Улсын Гадаад хэргийн яамны Гадаад худалдаа, эдийн засгийн хамтын ажиллагаа хариуцсан Төрийн нарийн бичгийн дарга Нина Васкүнлати, Монгол Улсаас Шведийн Хаант Улсад суух Онц бөгөөд Бүрэн эрхт Элчин сайд Т.Жанабазар нарыг МҮХАҮТ-ын Орлогч дарга Б.Намжилсүрэн хүлээн авч уулзлаа.
Финланд Улсын Гадаад хэргийн яамны Гадаад худалдаа, эдийн засгийн хамтын ажиллагаа хариуцсан Төрийн нарийн бичгийн дарга Нина Васкүнлати “Эдийн засаг, шинжлэх ухаан, техникийн хамтын ажиллагааны Монгол, Финландын Засгийн газар хоорондын комиссын XIV хуралдаан”-д оролцохоор Монгол Улсад хүрэлцэн ирснээ тэмдэглээд уг хуралдаанаар хоёр орны найрсаг харилцааг бэхжүүлэх, цар тахлын дараах эдийн засгийн харилцааг сэргээх, ялангуяа, худалдаа, хөрөнгө оруулалт, аялал жуулчлал, соёл, боловсрол, мэдээллийн технологи зэрэг салбарт хамтын ажиллагааг өргөжүүлэх талаар ярилцаж, уулзалтын дүнгээр хамтарсан протокол байгуулсан гэлээ. Ирэх онд хоёр орны хооронд дипломат харилцаа тогтоосны 60 жилийн ой тохионо. Энэ хүрээнд хувийн хэвшлийн хамтын ажиллагааг өргөжүүлэх, бизнес эрхлэгчдийг холбох арга хэмжээг МҮХАҮТ-тай хамтарч зохион байгуулах хүсэлтэй байна гэв.
МҮХАҮТ-ын Орлогч дарга Б.Намжилсүрэн МҮХАҮТ нь бизнес эрхлэгчдийг дэмжих, уул уурхайн бус экспортыг нэмэгдүүлэх чиглэлд ажилладаг талаар танилцуулаад, хоёр орны худалдаа, эдийн засгийн хамтын ажиллагааг идэвхжүүлэх, бизнесийн түншлэлийг өргөжүүлэх арга хэмжээг зохион байгуулахад бүхий л талаар дэмжлэг үзүүлж, хамтран ажиллахаа илэрхийлэв.
Мөн уулзалтад Монголын ноос, ноолуурын холбооны менежер Ц.Туяа оролцож, ноолуурын салбарын талаар танилцуулга хийлээ.
Монгол, Финланд хоёр улсын худалдааны эргэлт 2020 оны байдлаар 23.2 сая ам.долларт хүрснээс экспорт 25 мянган ам.доллар, импорт 23.1 сая ам.доллар байна.
Уулзалтаар талууд хоёр орны бизнес эрхлэгчдийг холбох чиглэлд цаашид хамтран ажиллахаар тохиролцов.
