Монголын Үндэсний Худалдаа Аж Үйлдвэрийн Танхимын дэргэдэх Соёлын бүтээлч үйлдвэрлэлийг дэмжих зөвлөлийн анхдугаар хурал боллоо
Монголын Үндэсний Худалдаа Аж Үйлдвэрийн Танхимын дэргэд Соёлын бүтээлч үйлдвэрлэлийг дэмжих зөвлөлийг байгуулж, үйл ажиллагаагаа эхлүүллээ. Тус зөвлөл нь соёлын бүтээлч үйлдвэрлэлийг хөгжүүлэх, салбарын тогтвортой хөгжлийг дэмжих чиглэлээр ажиллах юм.
Соёлын бүтээлч үйлдвэрлэлийг дэмжих зөвлөлийн анхдугаар хурал өчигдөр /2022.10.12/ боллоо. Тус хуралдаанд Монголын соёлын салбарын байгууллагуудын удирдлага, төлөөллүүд оролцож цаашдын үйл ажиллагааны чиглэлээ тодорхойлж, тулгамдаж буй асуудал болоод шийдвэр гаргалгааг хэлэлцлээ.
Зөвлөлийн үйл ажиллагааны чиглэлийг эдийн засгийн эргэлтийг дэмжих, хүний нөөцийг бэлдэж чадавхжуулах, оюуны өмчийг хамгаалах гэсэн үндсэн гурван хүрээнд явуулахаар төлөвлөж буйг Соёлын бүтээлч үйлдвэрлэлийг дэмжих зөвлөлийн дарга Э.Чинзориг хэлж байлаа.
Загвар зохион бүтээгч Ариунаа Сүри: Соёлын бүтээлийг гадаадад гаргах экспортын үйл ажиллагааг гардан хийх баг, төлөвлөгөө их чухал юм шиг санагддаг. Уран бүтээлчид үүнийг дангаараа бие дааж хийхээр алдаж, бүтэлгүйтдэг асуудал бий. Ямар ч гоё зүйл хийгээд гадагш нь танилцуулж, борлуулъя гэхээр ямар ч дэмжлэг байдаггүй. Тэгэхээр үүнийг бид зөвлөлийн үйл ажиллагааны бодлогодоо тусгаж цаашид анхаарах хэрэгтэй. Бид дотооддоо 2 сая хүний 200 мянган хүнд зориулж бүтээгдэхүүн гаргаад эдийн засгийн эргэлтэд оруулах боломжгүй. Тиймээс монгол бүтээлүүдээ гадагш нь гаргаж, борлуулах нь чухал болоод байна.
Соёлын бүтээл үйлдвэрлэгчдэд тулгамдаж буй асуудлыг хэлэлцэж зарим боломжит шийдлийн талаар санал солилцлоо. Тухайлбал, тус салбар дахь суурь судалгаа, олон улсын соёлын бүтээлээ хэрхэн дэмждэг ноу-хоу туршлагыг судлах, эрх зүйн орчин тэр дундаа оюуны өмчийн асуудлыг шийдвэрлэх, яамны үйл ажиллагаатай уялдуулж бодлого боловсруулж, нөлөөлөх болон соёлын бүтээл төрөх, сурталчлах, борлуулах, гаднын зах зээлд гаргаж эдийн засгийн эргэлтэд оруулах үйл ажиллагааг хооронд нь уялдаатай болгож, цаашлаад үүнийг хариуцсан нэгж шаардлагатай байгааг онцоллоо.
Мөн цаашлаад хөрөнгө оруулалтыг гаднын орнуудаас гэхээсээ илүүтэй дотоодоосоо татах нь чухал болон ирээдүйтэй буюу амжилттай хэрэгжихүйц контент, бүтээлээ нэн түрүүнд дэмжих шалгууртай болох шаардлагатай байгааг дурдаж байлаа.
