“Монгол-Чехийн бизнес форум” боллоо

Хоёр орны худалдаа, эдийн засгийн хамтын ажиллагааг идэвхжүүлэх, хамтын ажиллагааны шинэ боломжуудын талаар санал солилцох, бизнесийн түншлэлийг өргөжүүлэх зорилгоор Бүгд Найрамдах Чех Улсаас Монгол Улсад суугаа ЭСЯ, МҮХАҮТ, Чехийн Эдийн Засгийн Танхим хамтран “Монгол, Чехийн Бизнес форум”-ыг зохион байгууллаа.

Форумд БНЧУ-аас Монгол Улсад суугаа Онц бөгөөд Бүрэн эрхт Элчин сайд Ян Вытопил, БНЧУ-ын Эдийн Засгийн Танхимын Дэд Ерөнхийлөгч Радек Якубскый, БНЧУ-ын Үйлдвэр худалдааны яамны Ашигт малтмалын бодлогын хэлтсийн дарга Ярослав Райф болон тус улсын компаниудын төлөөлөл оролцов.

МҮХАҮТ-ын Ерөнхийлөгч О.Амартүвшин Монгол Улсаас Чех Улс руу 2022 оны эхний 10 сарын байдлаар 19.42 мянган ам.долларын сүлжмэл, ноос, ноолууран бүтээгдэхүүн экспортолж, 3 сая 286 мянган ам.долларын тээврийн хэрэгсэл, сэлбэг, эд анги, том оврын автомашин, цахилгаан бараа, үйлдвэрлэлийн тоног төхөөрөмж, эм, эрүүл мэндийн бүтээгдэхүүн зэрэг бараа бүтээгдэхүүн импортолсон байна гэлээ.

Цаашид ч хоёр орны худалдаа, эдийн засаг, бизнесийн хамтын ажиллагааны цар хүрээ, нэр төрлийг нэмэгдүүлэх, өргөжүүлэх, бизнес эрхлэгчдэд хамтын ажиллагааны боломжийг нээж өгөх, өөр хооронд нь холбоход идэвхийлэн ажиллахаа илэрхийлсэн юм.

БНЧУ-аас Монгол Улсад суугаа Онц бөгөөд Бүрэн эрхт Элчин сайд Ян Вытопил манай хоёр улс найрсаг, хамтын ажиллагаатай орон. Худалдаа, тээвэр логистик зэрэг эдийн засгийн хамтын ажиллагаа ямар нэгэн саад тотгор, асуудалгүй үргэлжилж байгааг тэмдэглэсэн бол БНЧУ-ын Үйлдвэр худалдааны яамны Ашигт малтмалын бодлогын хэлтсийн дарга Ярослав Райф Монгол Улстай олон талаар хамтран ажиллах боломжтой, тухайлбал түүхий эдийг олборлох, боловсруулах, нөхөн сэргээлтэд Чехийн өндөр технологиудыг ашиглах боломж байгааг тодотгов.

БНЧУ-ын Эдийн Засгийн Танхимын Дэд ерөнхийлөгч Радек Якубскый аль ч салбарт хамтран ажиллах боломжтой. Монголын ААН-үүдийг Чехийн ААН-үүдтэй холбох, маш сайн хамтын ажиллагааг санал болгон ажиллана гэж хэллээ.

Чехийн талаас эмнэлгийн тоног төхөөрөмж, тээвэр логистик, химийн салбар, архитектор зураг төсөл, нийтийн тээврийн хэрэгсэл, нислэгийн системийн хөдөлгөөний хяналтын системийн үйлдвэрлэгч, барилга бүтээн байгуулалтын төслийн зөвлөх үйлчилгээ, аялал жуулчлал, хүний нөөц экспортын даатгал зэрэг салбарын 10 аж ахуй нэгж, Монголын талаас 30 гаруй бизнес эрхлэгч оролцож, В2В уулзалт зохион байгууллаа.