Газар зүйн заалтыг хөгжүүлэхэд хувийн хэвшлийн оролцоо, санаачлага чухал
Хууль зүй, дотоод хэргийн яам, Оюуны өмчийн газар, Европын Холбоo, НҮБ-ын Хүнс, хөдөө аж ахуйн байгууллага хамтран “Газар зүйн заалтын ач холбогдол” чуулга-уулзалтыг зохион байгууллаа. Чуулга-уулзалтын "Газар зүйн заалтыг хөгжүүлснээр Монгол Улсын бүтээгдэхүүнийг дэлхийн зах зээлд гаргах боломжууд" панел хэлэлцүүлэгт МҮХАҮТ-ын Ерөнхийлөгч О.Амартүвшин оролцлоо.
Тэрээр "Газар зүйн заалтыг хөгжүүлэх нь брэндинг, үнэ цэнийг бий болгох чухал ач холбогдолтой. Хувийн хэвшлүүд хоорондоо өрсөлдөх бус хамтарч, кластераар хөгжиж гадаад зах зээлд гарахыг эрмэлзэх хэрэгтэйг онцлоод Компаниуд газар зүйн заалтыг хөгжүүлэхэд санаачлага гарган, манлайлан оролцож, төрийн байгууллага болон эрдэм шинжилгээний байгууллага зэрэг бусад оролцогчидтой хамтран ажиллах шаардлагатай" гэв.
"МҮХАҮТ нь Монголын худалдааг дэмжих "TRAM" төсөлтэй хамтран нэмүү өртөг шингэсэн бүтээгдэхүүний 5 кластер, танхим өөрөө 1 кластер нийт 6 кластерийг байгуулан ажиллаж байна. Гадаад зах зээлд гарахад компаниуд нэгдэн, хамтарч кластераар хөгжих, түүнийг нь Төрөөс нэгдсэн бодлогоор дэмжих нь чухал" гэж хэллээ.
