“Улаанбаатар Түншлэл-2022” Олон Улсын үзэсгэлэн нээлтээ хийлээ
Хүнс, хөдөө аж ахуй, хөнгөн үйлдвэрийн яам, Нийслэлийн Засаг даргын Тамгын газар, Монголын Үндэсний Худалдаа Аж Үйлдвэрийн Танхим хамтран “Улаанбаатар түншлэл-2022” олон улсын үзэсгэлэн худалдааг зохион байгуулж байна. 47 дахь жилдээ зохион байгуулагдаж буй үзэсгэлэнгийн нээлтийн арга хэмжээ боллоо.
Энэ удаагийн үзэсгэлэнд Бүгд Найрамдах Беларус Улс, Малайз, Оросын Холбооны Улс, Тайваниас хүнс, ХАА-н бүтээгдэхүүн, ХАА-н тоног төхөөрөмж, эм, эмийн бүтээгдэхүүн, боловсролын салбар, модны үйлдвэр, ус цэвэршүүлэх төхөөрөмж, тээвэр ложистикийн салбарын 70 гаруй аж ахуй нэгжийн төлөөлөл хүрэлцэн ирж оролцож байна.
"Улаанбаатар-түншлэл 2022” үзэсгэлэн Мишээл экспод 9 дүгээр сарын 25-ныг дуустал үргэлжлэх бөгөөд үзэсгэлэнд хүрэлцэн ирснээр оролцогч аж ахуйн нэгжүүдийн бүтээгдэхүүн, бараа, үйлчилгээтэй танилцах, боломжит худалдан авагч, ханган нийлүүлэгч, бизнесийн түншүүдтэйгээ уулзах, гэрээ хэлцэл хийх, шинэ хамтын ажиллагааг эхлүүлэх боломжтой.
Монгол Улсыг зорин ирсэн гадаадын компаниудтай В2В (бизнес уулзалт хийх) уулзалтын цэгийг тусгайлан зассан тул түнш байгууллага хайж буй импортлогч аж ахуйн нэгжүүд сонирхсон компаниудтайгаа уулзаж, бизнесийн харилцаа, хамтын ажиллагаагаа өргөжүүлэхийг урьж байна.
Гадаад, дотоодын 100 гаруй ААН доорх нэр төрлийн бараа, бүтээгдэхүүн, үйлчилгээгээр оролцож байна:
- Хүнс, хүнсний бүтээгдэхүүн
- Хөнгөн үйлдвэрийн салбар
- Эмнэлэг, эрүүл мэндийн бүтээгдэхүүн
- Барилга, барилгын материал, жижиг тоног төхөөрөмж
- Мэдээллийн технологи
- Банк санхүүгийн болон бизнесийн зөвлөх үйлчилгээ
- Шинэ техник, технологи, инноваци
Нээлтийн арга хэмжээний үеэр МҮХАҮТ Малайзын Олон улсын худалдаа аж үйлдвэрийн танхим болон Малайзын дунд түвшний компаниудын консорциумтай Хамтын ажиллагааны Санамж бичиг байгууллаа.
МҮХАҮТ-ын зүгээс Монгол Улсын цахим худалдаа, цахим үзэсгэлэнгийн анхны нэгдсэн платформ болох www.trademongolia.mn -ийг нээж, платформд МҮХАҮТ-ын нийт 5,500 гаруй гишүүн байгууллага байрлуулаад байна. Мөн “Улаанбаатар түншлэл-2022” үзэсгэлэнд оролцож буй гадаадын аж ахуйн нэгжүүдийг энэхүү платформд нэгтгэж, үзэсгэлэнгийн үйл ажиллагаагаар хязгаарлагдахгүйгээр тогтмол Монголын болон бусад улс орнуудын бизнес эрхлэгчидтэй хамтын ажиллагааг өргөжүүлэх, шууд худалдаа хийх, цахим үзэсгэлэнд оролцох боломжийг бүрдүүллээ.
