Сүүлийн 5 жилийн дунджаар уул уурхайн салбар ДНБ-ны 15, нийт экспортын 90 гаруй хувийг бүрдүүлж байна
“Уул уурхайн 7 хоног”-ийн хүрээнд олон улсын уул уурхайн "Mонголиа Майнинг" үзэсгэлэн "Степпе Арена" цогцолборт өнөөдөр нээлтээ хийлээ.
11 дэх жилдээ зохион байгуулагдаж буй тус үзэсгэлэнг нээж МҮХАҮТ-ын Ерөнхийлөгч О.Амартүвшин үг хэллээ.
“Уул уурхайн салбар сүүлийн 5 жилийн дунджаар ДНБ-ны 15 хувийг, нийт экспортын 90 гаруй хувийг бүрдүүлж, нийт ажиллах хүчний 5 хувь энэ салбарт ажиллаж байгаа бөгөөд гадаадын хөрөнгө оруулалтын 70 гаруй хувийг эзэлж байна. 2021 оны ТОП ААН-ийн 22 нь уул уурхай, олборлох үйлдвэрлэлийн салбарт байгаагаас эдийн засагт хэр жинтэй хувь нэмэр оруулж байгааг харж болно” гэдгийг хэлсэн үгэндээ онцлоод “Монгол Улсын Засгийн газрын Шинэ сэргэлтийн бодлогын хүрээнд томоохон төслүүдийг төр хувийн хэвшлийн түншлэл дээр тулгуурлан хэрэгжүүлэх зорилтыг тавьсан бөгөөд үүнд уул уурхайн салбарын төслүүд зонхилж байна. Эдийн засгийн нөхцөл байдал хүнд байгаа энэ үед Шинэ сэргэлтийн бодлогыг хэрэгжүүлэхэд хөрөнгө оруулалтын хамгийн чухал боломжит эх үүсвэр нь гадаадын шууд хөрөнгө оруулалт, хөрөнгө оруулалтыг татах гол салбар нь уул уурхайн салбар" гэв.
"Mонголиа Майнинг" үзэсгэлэнд гадаад, дотоодын 130 гаруй аж ахуйн нэгж оролцож байна. Үэсгэлэн 9 дүгээр сарын 24-нийг хүртэл үргэлжлэх бөгөөд үзэсгэлэнд хүрэлцэн ирснээр уул уурхай, газрын тосны шинэ техник, технологиудтай танилцах, боломжит худалдан авагч, ханган нийлүүлэгч, бизнесийн түншүүдтэйгээ уулзах, шинэ хамтын ажиллагааны суурийг тавих боломжтой.
Мөн эрдэс баялгийн салбарт төрөөс баримтлах бодлого, холбогдох хуулиуд, Монгол Улсад хэрэгжих уул уурхай дэд бүтцийн төслүүд сэдвийн хүрээнд семинар зохион байгуулах аж.
