“Гааль-Бизнесийн Түншлэл-2022” уулзалт Хариуцлагатай Бизнес-Хөгжлийн Гарц сэдвийн хүрээнд өрнөв

МҮХАҮТ, Гаалийн ерөнхий газар хамтран гадаад худалдааг хөнгөвчлөх, бизнесийн таатай орчинг бүрдүүлэх, гааль-бизнесийн түншлэлийг бэхжүүлэх, бизнес эрхлэгчдэд гадаад худалдаатай холбоотой тулгамдаж буй асуудлууд, тэдгээрийг шийдвэрлэх гарц, шийдлийн талаар харилцан санал солилцох “Гааль-Бизнесийн түншлэл-2022” уулзалт, хэлэлцүүлгийг зохион байгууллаа.

Уулзалт “Хариуцлагатай бизнес-Хөгжлийн гарц” сэдвийн хүрээнд өрнөж, ГЕГ-аас Гаалийн хорио цээрийн газрын хяналт шалгалт, Монгол Улсын хилээр нэвтрүүлж буй бараа, бүтээгдэхүүний хадгалалт, тээвэрлэлтийн шаардлага, Гаалийн магадлан шинжилгээ шинэчлэлийн хүрээнд хийгдэж буй ажлуудын талаар мэдээлэл танилцуулав.

МҮХАҮТ-ын Ерөнхий нарийн бичгийн дарга С.Баясгалан уулзалтын нээлтэд хэлсэн үгэндээ “МҮХАҮТ-аас энэ 9 дүгээр сард бизнес эрхлэгчдийн дунд явуулсан “Цар тахлын дараах бизнесийн нөхцөл байдал” судалгааны дүнгээс харахад оролцогчдын 73% нь ханган нийлүүлэлт тасалдаж, хоцорч байгаа сөрөг нөлөөллийг бууруулахад хилийн боомтын үйл ажиллагааг хэвийн болгох, түүхий эдийн экспорт, импорт хийхэд хил, гаалиар шуурхай горимоор нэвтрүүлэх, гадаадын шууд хөрөнгө оруулалтыг дэмжсэн бодлого шийдвэр гаргах зэрэг нь чухал дэмжлэг болно гэж үзсэн” гэдгийг онцлон тэмдэглэсэн юм.

Мөн МҮХАҮТ-ын Судалгааны институтийн дарга О.Түмэн-Амар “Цар тахлын дараах бизнесийн орчин” сэдвээр танилцуулга хийв. Ханган нийлүүлэлтийн тасалдлын нөлөө бизнесийн салбарт ихээр нөлөөлж буй бөгөөд хил, боомтын асуудлуудыг нэн түрүүнд шийдвэрлэх шаардлагатайг байгааг дурдлаа.

"Гааль-Бизнесийн түншлэл-2022” уулзалтад ХХААХҮЯ, ГЕГ, МХЕГ, СХЗГ, Мал эмнэлгийн ерөнхий газар, Эм эмнэлгийн хяналтын хяналт зохицуулалтын газар зэрэг төрийн байгууллагын төлөөлөл, бизнес эрхлэгчид нийт 150 гаруй хүн оролцлоо.

Оролцогчид:

• Үнэ үнэлгээ ангилал, БТКУС
• Мал эмнэлэг, ургамал, хорио цээрийн хяналт
• Эрүүл ахуй, хүнсний чанар, стандартын хяналт
• Гаалийн төв лаборатори
• Тарифын бус хязгаарлалт гэсэн багуудад хуваагдан чиглэлийн нарийн мэдээлэл авч, санал солилцлоо.

Мөн энэ үеэр экспортлогч болон импортлогч компаниуд бүтээгдэхүүний үзэсгэлэнгээ гаргав.