О.Амартүвшин: Гадаадын шууд хөрөнгө оруулалт бол эдийн засгийн болон хөгжлийн зорилтуудаа биелүүлэх хамгийн боломжит чухал эх үүсвэр
Монгол Улсад уул уурхайн салбар үүсэж хөгжсөний 100 жилийн ойн хүрээнд “Mongolia Mining Week” Уул уурхайн долоо хоног үргэлжилж байна. Өнөөдөр Олон улсын хөрөнгө оруулалтын чуулган зохиогдож буй бөгөөд МҮХАҮТ нь Уул уурхайн долоо хоног арга хэмжээний дэмжигч байгууллагаар оролцож байна.
МҮХАҮТ-ын Ерөнхийлөгч О.Амартүвшин “Хөрөнгө оруулалтын өнөөгийн байдал, төр хувийн хэвшлийн хамтын ажиллагаа” сэдвийн хүрээнд Гадаадын хөрөнгө оруулалтын статистик мэдээлэл, хөрөнгө оруулалтын орчны үнэлгээ, хөрөнгө оруулалтад тулгамдаж буй асуудал, сайжруулах арга замуудын талаар илтгэл танилцууллаа.
2011-2021 оны хооронд Монгол Улсад нийт 32.3 тэрбум ам.долларын гадаадын шууд хөрөнгө оруулалт (ГШХО) хийгдсэн бөгөөд үүний 48.7% буюу 14.7 тэрбум ам.долларын хөрөнгө оруулалт нь Канад Улсаас хийгдсэн бөгөөд БНХАУ, Люксембург улсуудаас 4.8, 2.9 тэрбум ам.долларууд орсон байна. Сүүлийн 10 жилийн байдлаар эдийн засгийн өсөлт болон ГШХО-ын үлдэгдлийн өсөлт хоорондын шууд хамаарлыг тооцоход 0.73 буюу хүчтэй, эерэг хамааралтай байна.
Засгийн газрын зүгээс эдийн засгийн болон хөгжлийн зорилтуудаа биелүүлэхэд хамгийн боломжит чухал эх үүсвэр нь ГШХО.
Канад Улсын Фрэйзер интститутээс улсуудын төрийн бодлого нь уул уурхайн хөрөнгө оруулалтад хэрхэн нөлөөлж буйг тодруулах “Уул уурхайн компаниудын судалгаа”-г жил бүр явуулдаг бөгөөд 2021 онд нийт 290 гаруй уул уурхайн компаниас санал хүлээн авч 84 улс, муж, бүс нутгуудыг “Хөрөнгө оруулалтын таатай байдлын индекс” болон “Бодлогын төсөөллийн индекс” гэсэн үндсэн хоёр үзүүлэлтээр эрэмбэлжээ.
Хөрөнгө оруулалтын таатай байдлын индексээр Монгол Улс 50.66 оноо авч 84 оролцогчоос 63-т эрэмбэлэгдсэн бол Баруун Австрали муж 90.21 оноогоор 1-т орсон байна.
Бодлогын төсөөллийн индексээр хөрөнгө оруулалтын шийдвэр гаргахад тухайн улсын бодлого нь хэрхэн нөлөөлж байгааг тодорхойлохыг зорьдог бөгөөд Монгол Улс 36.65 оноогоор 84 оролцогчоос 75-д эрэмбэлэгдсэн үзүүлэлттэй байна.
