Цар тахлын дараах бизнесийн нөхцөл байдлын судалгааны үр дүнг танилцууллаа
УИХ дахь Ардчилсан намын бүлэг санаачилж, МҮХАҮТ-тай хамтран бизнес эрхлэгчдийн уулзалт, хэлэлцүүлгийг зохион байгууллаа. Уулзалтад УИХ дахь Ардчилсан намын бүлгийн дарга О.Цогтгэрэл, УИХ-ын дэд дарга С.Одонтуяа, УИХ-ын гишүүн Н.Ганибал, МҮХАҮТ-ын Ерөнхийлөгч О.Амартүвшин болон 50 гаруй бизнес эрхлэгч оролцлоо.
МҮХАҮТ-ын Ерөнхийлөгч О.Амартүвшин эдийн засгийн үзүүлэлтүүд, Цар тахлын дараах бизнесийн нөхцөл байдлын судалгааны үр дүн, нэгдсэн дүгнэлт, санал зөвлөмжийг танилцуулав.
Цар тахлын дараах бизнесийн нөхцөл байдлын судалгаанд хамрагдсан 1070 аж ахуйн нэгжийн 86% нь үйл ажиллагаа ямар нэг түвшинд сэргэсэн гэж үзсэн бол бизнес эрхлэгчдийн 79% нь үйл ажиллагаагаа тогтвортой явуулж байна гэжээ. Мөн зээлийн олдоц муу, хүүгийн түвшин өндөр, хугацаа богино, барьцаа хөрөнгийн шаардлага хангахгүй учир зээл авч чадахгүй байгаа, түүхий эд бараа материалын үнэ өссөн, үйл ажиллагаа, ажиллах хүчний зардал өсөж, борлуулалт буурсан, татварын өртэй болсон зэрэг нөлөөтэй байгааг судалгаанд оролцогчид дурджээ.
Цаашид бизнесийн үйл ажиллагаа бүрэн сэргэхэд:
- Хил, боомтын асуудлуудыг шийдэх,
- Тээвэр логистикийн асуудлуудыг шийдэх,
- Хөнгөлөлттэй зээл, санхүүжилт олгох шаардлагатай байгааг танилцуулав.
Мөн энэ үеэр, Монгол Улсын макро эдийн засгийн нөхцөл байдлын талаар УИХ-ын дэд дарга С.Одонтуяа, Эдийн засгийн эрх зүйн орчны талаар УИХ-ын гишүүн Н.Ганибал нар илтгэл тавьж, бизнес эрхлэгчдийн дунд чөлөөт хэлэлцүүлэг өрнүүлэв.
Бизнес эрхлэгчдийн зүгээс ажиллах хүчин, зээлийн хөнгөлөлттэй нөхцөл, татварын хөнгөлөлт, урамшуулал болон эдийн засгийн нөхцөл байдалтай холбоотой асуудлаар санал хүсэлтээ илэрхийллээ.
