Беларусийн 28 компани “Улаанбаатар Түншлэл-2022”олон улсын үзэсгэлэнд оролцоно
МҮХАҮТ-ын Ерөнхийлөгч О.Амартүвшин Беларусийн ХАҮТ-ын дарга Мятликов Михаил Михайлович нарын албаны хүмүүстэй цахим уулзалт хийв. Цахим уулзалтыг хоёр орны Элчин сайдын яамны дэмжлэгтэйгээр зохион байгуулсан бөгөөд тус уулзалтад Монгол Улсаас Бүгд Найрамдах Беларусь Улсад суух Онц бөгөөд Бүрэн эрхт Элчин сайд Б.Баярсайхан, Монгол Улс дахь Бүгд Найрамдах Беларусь Улсын Элчин сайдын яам болон ХАҮТ-уудын холбогдох албаныхан оролцлоо.
47 дахь удаагийн “Улаанбаатар түншлэл-2022” үзэсгэлэнд БН Беларусь Улсаас хүнс, шингэн хүнс, хөдөө аж ахуйн тоног төхөөрөмж, эм, эмнэлгийн хэрэгсэл, автомашин, уул уурхайн машин механизмын 28 компани оролцох төдийгүй 9 дүгээр сарын 23-нд Бизнес форум хамтран зохион байгуулах юм. Талууд цаашид хамтын ажиллагаагаа өргөжүүлж, хоёр улсын худалдааг нэмэгдүүлэх, бизнесийн байгууллагуудыг хооронд нь холбох В2В уулзалт, бизнес аялал, аж ахуйн нэгжүүдтэй танилцах үйл ажиллагаа, үзэсгэлэнд харилцан оролцох зэргээр гадаад хамтын ажиллагаагаа эрчимжүүлэхээр санал солилцлоо.
Уулзалтын үеэр Беларусийн ХАҮТ-ын зүгээс МҮХАҮТ-ын Ерөнхийлөгч О.Амартүвшин болон Монголын бизнес эрхлэгчдийг тус улсын нийслэл Минск хотноо хүрэлцэн очиж, Брестийн эдийн засгийн чөлөөт бүстэй танилцах, Бизнес форум зохион байгуулах, “Бел-Агро” хөдөө аж ахуйн салбарын олон улсын үзэсгэлэнд оролцохыг урилаа.
Энэ онд Монгол Улс, Бүгд найрамдах Беларусь Улс хооронд дипломат харилцаа тогтоосны 30 жилийн ой тохиож байгаа бөгөөд хоёр орны хооронд худалдаа, эдийн засгийн чиглэлээр хамтын ажиллагаа өрнүүлэх боломж, нөөц асар их, үүнд хоёр орны Танхимуудын үүрэг оролцоо их гэдгийг Элчин сайд онцлон тэмдэглэв.
БНБУ нь Монгол Улсын ЕХ-той холбогдох, дамжин өнгөрөх тээврийн гол төв бөгөөд хөдөө аж ахуй, үүн дотроо эрчимжсэн мал аж ахуй, сүү, сүүн бүтээгдэхүүний үйлдвэрлэл хөгжсөн, манай улстай найрсаг харилцаатай улс юм.
