МҮХАҮТ-ын “Даймонд” гишүүнээр В Продакшн элслээ
В продакшнд МҮХАҮТ-ын “Даймонд” гишүүний гэрчилгээг гардууллаа. Энэ үеэр МҮХАҮТ-ын Ерөнхийлөгч О.Амартүвшин “Монголын бизнесийн салбарт том үйл явдал тохиож байна. Аливаа урлагийн салбар тухайн улсын экспортын чухал бүрэлдэхүүн хэсэг нь байдаг. Тухайн улс өөрийн брэндингээ тодорхойлох нэг элемент нь урлаг. Урлаг, киноны дуу хөгжим, бичлэг маш чухал. Үүнийг бид олон улсын стандартын дагуу хийж байж дэлхийн зах зээлд өрсөлдөх чадвартай болно. Энэ салбарт томоохон хөрөнгө оруулалт хийж, манлайлах зоригтой алхам хийсэн В продакшны хамт олонд амжилт хүсье” гэв.
“Урлаг интертаймент бизнес. Энэ салбарт бизнес харилцаа өргөжиж байж хөрөнгө оруулалт татна, гадаад зах зээлийн зарчим нь ийм онцлогтой” хэмээн тус продакшны захирал Д.Болд тодотгосон юм.
МҮХАҮТ нь цаашид В продакшнтай соёлын экспортыг хөгжүүлэх, шинэ түвшинд гаргах, соёлын бүтээлч үйлдвэрлэлийг дэмжих, соёлын бүтээлч үйлдвэрлэлийн эрх зүйн орчин, оюуны өмчийг хамгаалах чиглэлээр санал санаачилга гарган хамтран ажиллана.