О.Амартүвшин: Тогтвортой хөгжлийн зорилгыг хэрэгжүүлэх нэг чухал багана бол хувийн хэвшил
Энэхүү өдөрлөгт МҮХАҮТ хувийн хэвшлийн оролцоог хангаж оролцсон ба 30 гаруй ААН бүртнүүлэн, өдөрлөгт оролцлоо. Мөн танхимийн дэргэдэх ЦойлогсоZ төсөл нь SDG Open Day-тэй хамтран залуусыг байгаль орчиндоо ээлтэй ногоон мөр үлдээхэд уриалсан, тогтвортой хөгжлийн зорилтыг энгийн аргаар өдөр тутамдаа хэрхэн нэвтрүүлэхийг таниулах зорилгоор Z family групп дээр "Тогтвортой хөгжлийн 5 алхам" чалленжийг зохион байгууллаа.
Тогтвортой хөгжлийн зорилгуудын талаарх олон нийтийн мэдлэг, ойлголтыг дээшлүүлэх, хэрэгжилтийг эрчимжүүлэхэд иргэд, байгууллагуудын оролцоо, түншлэлийг дэмжихэд чиглэсэн “Тогтвортой хөгжлийн зорилгын нээлттэй өдөрлөг”-ийг НҮБ-ын Монгол дахь Суурин төлөөлөгчийн газар, Эдийн засаг, хөгжлийн яам, Гадаад харилцааны яам, НЗДТГ, МҮХАҮТ хамтран Сүхбаатарын талбайд зохион байгууллаа. Арга хэмжээний нээлтэд НҮБ-ын Суурин зохицуулагч Тапан Машра, Эдийн засаг, хөгжлийн сайд Ч.Хүрэлбаатар, Гадаад харилцааны сайд Б.Батцэцэг, МҮХАҮТ-ын Ерөнхийлөгч О.Амартүвшин нар оролцож үг хэлэв.
Тогтвортой хөгжлийн зорилгыг хэрэгжүүлэх нэг чухал багана бол хувийн хэвшил. Тогтвортой хөгжлийн 17 зорилгоос МҮХАҮТ нь дараах үндсэн 3 зорилгод анхаарлаа хандуулан ажиллаж байна:
- Эмэгтэйчүүдийн эдийн засгийн чадавхийг нэмэгдүүлэх
- Залуу үеийг дэмжих
- Инноваци болон дэд бүтцийг хөгжүүлэх
Өнөөдрийн байдлаар бид Тогтвортой хөгжлийн зорилгын төлөөх 30 гаруй төсөл хөтөлбөр болон 20 гаруй ажлыг зохион байгуулан ажиллаж байна. Цаашид Монголын 100 мянга гаруй ААН-ийг Тогтвортой хөгжлийн зорилгод нэгтгэж, манлайлж ажиллах нь Танхимын үндсэн үүрэг гэж МҮХАҮТ-ын Ерөнхийлөгч О.Амартүвшин хэлсэн үгэндээ онцлов.
Нээлттэй өдөрлөгийн үеэр МҮХАҮТ болон Экспортын кластер үйл ажиллагаагаа танилцуулж оролцлоо. Мөн хувийн хэвшил, бизнесийн байгууллагууд тогтвортой хөгжлийн зорилгыг хэрэгжүүлж буй сайн туршлага, шинэлэг санаачилгуудаасаа танилцуулав.
- Тогтвортой хөгжлийн зорилго нь хүн бүрд хамааралтай!
- "Алсын хараа 2050" болон Тогтвортой хөгжлийн зорилгод хүрэхэд хүн бүрийн оролцоо, санаачилга, түншлэл чухал билээ.
