МҮХАҮТ-ын дэргэдэх Хуулийн бодлогын зөвлөлийн хурал болж, шинэ дарга томилогдлоо
Хуулийн бодлогын зөвлөл хуралдаж, цаашдын үйл ажиллагааны чиглэл, бүтэц зохион байгуулалтын шинэчлэлийн талаар санал солилцлоо. МҮХАҮТ-ын Ерөнхийлөгч О.Амартүвшин хурлыг нээж хэлсэн үгэндээ өнгөрсөн хугацаанд хуулийн бодлогын зөвлөлөөс Зөвшөөрлийн тухай хууль, Хөдөлмөрийн тухай хуулийн шинэчилсэн найруулга зэрэг томоохон хуулийн төслүүд дээр үр дүнтэй ажилласан бөгөөд бусад хуулийн төслийн хэлэлцүүлгүүдэд идэвхтэй оролцож санал зөвлөмж өгч ажиллаж ирснийг тэмдэглээд цаашид хууль дүрэм, журмыг амьдралд нийцүүлэн боловсруулж батлуулахад бизнес эрхлэгчдийн саналыг тусгах, оролцоог хангах, уялдаа холбоог сайжруулах, бодлогын өмгөөллийн чиглэлээр улам илүү ажиллах шаардлагатай байгааг онцлов. МҮХАҮТ-ын дэргэдэх зөвлөлүүдийн ажиллах зарчим, Хуулийн бодлогын зөвлөлийн үйл ажиллагааны талаар мэдээллийг МҮХАҮТ-ын Бодлого, стратегийн газрын дарга Ж.Оюунчимэг танилцууллаа.
Зөвлөлийн энэ удаагийн хурлаар МҮХАҮТ-ын дэргэдэх Хуулийн бодлогын зөвлөлийн даргаар Ө.Жамбалсүрэнг санал нэгтэйгээр сонголоо. Ө.Жамбалсүрэн нь 2017 оноос “Скайтел” группийн “Скайтел” группийн Хууль, эрх зүйн албаны захирлаар ажиллаж байгаа бөгөөд Хуулийн бодлогын зөвлөлд 2018 оноос гишүүнээр идэвхтэй ажиллаж ирсэн юм. Тэрээр цаашид Хуулийн бодлогын зөвлөлийн үйл ажиллагааг тогтмолжуулах, зөвлөлийн гишүүдээс гаргасан шинэ санаачилгуудыг дэмжиж, уялдаа холбоотой ажиллахаа илэрхийллээ.
Өнгөрсөн хугацаанд зөвлөлийн даргын үүргийг гүйцэтгэж ирсэн, МУИС-ийн Хууль Зүйн Сургуулийн хувийн эрх зүйн тэнхимийн дэд профессор, доктор Т.Мэндсайханы зүгээс өнгөрсөн хугацаанд хийсэн гол ажлуудыг товч мэдээлж, зөвлөлийн үйл ажиллагааг идэвхжүүлэх талаар үнэтэй саналуудыг хэлж оролцлоо.
Зөвлөлийн гишүүд аж ахуйн нэгжүүдээс үйл ажиллагаагаа хэвийн явуулахад хууль эрх зүйн орчны хувьд ямар саад бэрхшээл тулгарч байгаа талаар санал асуулга явуулж аль салбарт ямар өөрчлөлт хийх шаардлагатай байгааг тогтоох, хууль журмын төсөлд санал өгөхдөө асуудлыг уг үндсээр нь судалж тодорхойлох, судалгаанд үндэслэн үйл ажиллагаа явуулах болон холбоод сургалт судалгааны байгууллагуудтай хамтын ажиллагааг хөгжүүлэх зэрэг саналуудыг гаргалаа.
Хууль эрх зүйн орчныг сайжруулахад бизнесийн байгууллагууд идэвхтэй хамтран ажиллах, харилцан санал бодлоо солилцох, үйл ажиллагаагаа үр дүнд хүргэх зорилгоор томоохон аж ахуйн нэгжийн хууль эрх зүйн удирдах ажилтнууд, туршлагатай хуульчид Зөвлөлд гишүүнээр шинээр орж ажиллах боллоо.
