“МОНГОЛЫН ӨДРҮҮД -2022” арга хэмжээ амжилттай болж өнгөрлөө
Монгол Улс, АНУ хоорондын худалдаа, эдийн засгийн хамтын ажиллагааг өргөжүүлэх, хөрөнгө оруулагчдыг татах, үндэсний үйлдвэрлэл болон монголын үндэсний өв, соёлыг сурталчлан таниулах зорилгоор зохион байгуулагдсан “Монголын өдрүүд - 2022” арга хэмжээ Вашингтон Ди Си хотод 8 дугаар сарын 29-31-ний өдрүүдэд амжилттай болж өнгөрлөө.
Энэхүү арга хэмжээний үеэр Засгийн газрын хэрэгжүүлэгч агентлаг Жижиг дунд үйлдвэрийн газрын дарга Я.Эрдэнэсайхан, Эдийн засгийн хөгжлийн яамны Гадаадын хөрөнгө оруулалтын бодлогын газрын дарга Б.Анар, Монголын Үндэсний Худалдаа, Аж Үйлдвэрийн Танхимын Ерөнхийлөгч О.Амартүвшин нар болон АНУ дахь Монгол Улсын ЭСЯ-ны төлөөлөл АНУ-ын Худалдааны танхим, Жижиг бизнесийн газар, Олон улсын хөгжлийн санхүүжилтийн газар, Дэлхийн банкны холбогдох удирдлагуудтай тус тус уулзаж, хоёр орны худалдаа, эдийн засгийн харилцааг өргөжүүлэх боломж, арга зам, санаачилга, тулгамдаж буй асуудлуудыг хэлэлцэн цаашид хамтран хэрэгжүүлэх үйл ажиллагааны талаар дэлгэрэнгүй санал солилцлоо.
Түүнчлэн энэхүү арга хэмжээнд Монголын ноолуур, ноос, эсгий, арьс шир, оёдол, гар урлал, гоо сайхны бүтээгдэхүүн, хүнсний үйлдвэрлэл эрхлэгч нийт 28 бизнес эрхлэгч, компанийн 60 орчим төлөөлөл ирж бараа бүтээгдэхүүнээ сурталчлан таниулахын зэрэгцээ хоёр талын бизнес уулзалтуудыг хийж, бүтээгдэхүүнээ зах зээлд өргөжүүлж түгээх боломжуудын талаар ярилцаж, туршлага судлав.
“Монголын өдрүүд - 2022” арга хэмжээнд дуучид, бүжигчид, зураач, хөгжимчин зэрэг нийт 20 гаруй уран бүтээлч оролцож, үндэсний өв соёлоо сурталчилсны зэрэгцээ үндэсний үйлдвэрлэгчдийн бүтээсэн хувцасны загварын шоуг үзүүлэв.
