МҮХАҮТ, Оюуны Өмчийн Газартай хамтын ажиллагааны санамж бичиг байгууллаа

МҮХАҮТ-ын Ерөнхийлөгч О.Амартүвшин, Оюуны өмчийн газрын дарга Г.Элбэгсайхан нар Байгууллага хоорондын үр дүнтэй хамтын ажиллагаа, харилцаа холбоог өргөжүүлэх, оюуны өмчийн эрх зүйн таатай орчинг бий болгоход төр, хувийн хэвшлийн түншлэлийг бэхжүүлэх зорилго бүхий санамж бичигт гарын үсэг зурлаа.

Энэхүү санамж бичгийн хүрээнд оюуны өмчийн эрхийн хамгаалалтын ач холбогдлыг бизнес эрхлэгч, олон нийтэд хүргэх, таниулан сурталчлах ажлыг хамтран зохион байгуулах юм. Мөн оюуны өмчтэй холбоотой хууль тогтоомж, бодлогын баримт бичигт нэмэлт, өөрчлөлт оруулах хэрэгцээ шаардлагад үндэслэн хэлэлцүүлэг зохион байгуулах, мэргэжлийн байгууллага, оролцогч талуудын оролцоог хангах чиглэлээр төлөвлөгөө гарган цаашид хамтран ажиллахаар болов.