(+976) 7727-7070
info@mongolchamber.mn
08:30 - 17:30
Ажлын цаг

“Гааль-Бизнесийн уулзалт” болж, бизнес эрхлэгчдээ сонслоо

2019/10/16 0

Гадаад худалдаа, бизнесийн үйл ажиллагааг хөнгөвчлөх, бизнес эрхлэгчдийн өмнө тулгарч байгаа хүнд суртал, олон шат дамжлагыг багасгах, тэдгээрт бизнесийн таатай орчинг бүрдүүлэх, гааль, татварын үйл ажиллагаа, үйлчилгээний чанарыг сайжруулах чиглэлээр  МҮХАҮТ болон Гаалийн Ерөнхий Газар 2008 оноос идэвхтэй хамтран ажиллаж байна.

Тухайлбал, мэдээллийг бизнес эрхлэгчдэд хүргэх, мэдээллийн ил тод нээлттэй тогтолцоог бий болгох, гадаад худалдааны цахим нэг цонхны системийг нэвтрүүлэх зэрэг олон ажлуудыг хэрэгжүүлж ирсэн.

Энэхүү хамтын ажиллагааны хүрээнд МҮХАҮТ, ГЕГ, ЕХ-ноос МҮХАҮТ-тай хамтран хэрэгжүүлж буй TRAM төсөл хамтран гадаад худалдааны үйл ажиллагааг хөнгөвчлөх, төрийн үйлчилгээг гадаад худалдаанд оролцогч иргэн, хувийн хэвшилд хүргэх зорилгоор Гааль-бизнесийн уулзалтыг  “Бизнес эрхлэгчдээ сонсоё” уриан дор 2019 оны 9 дүгээр сар 24-нд МҮХАҮТ-ын Их Танхимд зохион байгууллаа.

Уулзалтад ГЕГ, Улаанбаатар хот дахь гаалийн газар, Улс хоорондын шуудан илгээмжийн гаалийн газар, Буянт-Ухаа дахь гаалийн газар, МҮХАҮТ, TRAM төсөл, худалдаа эрхлэгч, мэргэшсэн холбоод, бусад төрийн байгууллагын нийт 150 гаруй төлөөлөл оролцов. 

Уулзалтыг нээж Гаалийн ерөнхий газрын Дэд дарга Б.Батхишиг, МҮХАҮТ-ын дарга Т.Дүүрэн, ТRAM Төслийн удирдагч Кармен Фратита нар үг хэлж, ГЕГ-ын ТЗУГ-ын дарга Ц. Гэндэнцэвээн “Ухаалаг гарц” бүртгэлийн шинэ систем буюу хилийн боомтын хүчин чадлыг нэмэгдүүлэх талаар болон ойрын хугацаанд ашиглалтад оруулах нийт 8 салбар лабораторийг танилцууллаа.

Мөн TRAM төслийн зөвлөх Владимир Писар “Гаалийн хөгжлийн чиг хандлага”, МҮХАҮТ-ын Хэрэглэгч, үйлчилгээний газрын мэргэжилтэн Ц. Хулан “МҮХАҮТ-с олгож буй гадаад худалдааны бичиг баримтууд” сэдвээр илтгэл танилцуулж бизнес эрхлэгчдийн дунд хэлэлцүүлэг өрнүүллээ.