Монгол Улсын Ерөнхийлөгч Энэтхэг улсад төрийн айлчлал хийлээ
Монгол Улсын Ерөнхийлөгч Х.Баттулга Бүгд Найрамдах Энэтхэг улс /БНЭУ/-ын Ерөнхийлөгч Рам Натх Ковиндын урилгаар 2019 оны 9 дүгээр сарын 19-23-нд тус улсад төрийн айлчлал хийлээ. Монгол Улсын төрийн тэргүүний 10 жилийн дараа БНЭУ-д хийж буй энэхүү айлчлалыг МҮХАҮТ-ын Ерөнхийлөгч О.Амартүвшин тэргүүтэй Танхимын 3500 гишүүн ААН-ийн төлөөлөл болсон ноос ноолуур, хүнд үйлдвэр, хөдөө аж ахуй, эм хангамж, мэдээллийн технологи чиглэлийн 17 бизнесийн төлөөлөгч дагалдан явжээ.
2019 оны 9 дүгээр сарын 20-ий өдөр зохион байгуулагдсан Монгол-Энэтхэгийн бизнес уулзалт дээр Монгол Улсын Ерөнхийлөгч Х.Баттулга хоёр улсын бизнес төлөөлөгч нарт хандаж үг хэлсэн бөгөөд МҮХАҮТ-ын Ерөнхийлөгч О.Амартүвшин, Энэтхэгийн Худалдаа, аж үйлдвэрүүдийн танхимуудын нэгдсэн холбоо /ASSOCHAM/-ны төлөөлөгч, Энэтхэгийн Аж үйлдвэрийн холбоо /CII/-ны төлөөлөгч, БНЭУ-ын Засгийн газрын гишүүн, Байгалийн хий, газрын тос, гангийн яамны сайд, ноён Shri Dharmendra Pradhan нар үг хэлж, МУ-ын Гадаад харилцааны яамны сайд Д. Цогтбаатар “Монгол улсын эдийн засгийн төлөв, бизнесийн боломжууд” сэдвээр танилцуулга хийсэн юм.
МҮХАҮТ-ын Ерөнхийлөгч О.Амартүвшин Энэтхэгийн Худалдаа, аж үйлдвэрүүдийн танхимуудын нэгдсэн холбоо /ASSOCHAM/, Энэтхэгийн Аж үйлдвэрийн холбоо /CII/-ны захирлуудтай уулзаж, хоёр улсын Худалдаа, аж үйлдвэрийн танхимуудын хамтын ажиллагааг шинэ шатанд гаргах, үзэсгэлэн яармаг, бизнес аялал, форум харилцан зохион байгуулах асуудлыг ярилцаж, Санамж бичгийг шинэчлэн байгуулахаар тогтлоо.
Хөдөө аж ахуй, ноос ноолуур, хүнд үйлдвэр, эм хангамж, мэдээллийн технологийн чиглэлийн 100 орчим бизнес эрхлэгч оролцсон энэ уулзалтын үеэр хоёр улсын худалдаа, бизнесийн салбарт хэрэгжих боломжтой төслүүдийн талаар мэдээлэл солилцож, эмийн үйлдвэр болон мэдээллийн технологийн чиглэлд хамтран ажиллах гэрээнүүдэд гарын үсэг зурсан байна.
