Жижиг дунд бизнес эрхлэгчид, бизнес эрхлэгч эмэгтэйчүүдийг дэмжих чиглэлээр Голомт банктай хамтран ажиллана

МҮХАҮТ-ын Ерөнхийлөгч О.Амартүвшин, Голомт банкны Гүйцэтгэх захирлын орлогч бөгөөд Бизнес хариуцсан захирал Д.Бадрал нар Хамтын ажиллагааны санамж бичигт гарын үсэг зурлаа. Санамж бичгийн хүрээнд бизнесийн орчныг сайжруулах, жижиг дунд, бичил бизнес эрхлэгчид болон бизнес эрхлэгч эмэгтэйчүүдийг дэмжих, бүтээмжийг дээшлүүлэх, уул уурхайн бус экспортыг нэмэгдүүлэх, тогтвортой санхүүжилтийг дэмжих чиглэлээр хамтран ажиллах юм.

Жижиг дунд үйлдвэрлэл эрхлэгчдэд санхүүгийн болон зөвлөгөө, үйл ажиллагааны бодит дэмжлэг үзүүлэх, бизнес эрхлэгч эмэгтэйчүүдийг хөгжүүлэхэд анхаарах, кластерыг хөгжүүлэхэд Голомт банктай хамтран ажиллана гэж МҮХАҮТ-ын Ерөнхийлөгч О.Амартүвшин онцоллоо. Мөн энэ онд орон нутгийн Салбар танхимуудыг бэхжүүлэхэд анхаарч ажиллаж байгаагаа тодотгоод орон нутагт кластерыг хөгжүүлэхэд хамтран ажиллах боломжтойг тэмдэглэв.

Голомт банкны Гүйцэтгэх захирлын орлогч бөгөөд Бизнес хариуцсан захирал Д.Бадрал бизнесийн орчныг сайжруулах, жижиг дунд бизнес эрхлэгчид болон бизнес эрхлэгч эмэгтэйчүүдийг дэмжих, кластерыг хөгжүүлэхэд банкны зүгээс хийж болох шат дараатай олон ажлуудыг МҮХАҮТ-тай хамтарч хэрэгжүүлнэ гэлээ.

Мөн хамтын ажиллагааны хүрээнд:

• Танхимын гишүүд, жижиг дунд, бичил бизнес эрхлэгчид, бизнес эрхлэгч эмэгтэйчүүдэд зориулсан санхүүгийн боловсролыг дээшлүүлэх сургалт зохион байгуулах,
• кластерчилсан хөгжлийг дэмжих чиглэлээр төрөл бүрийн материал, тоног төхөөрөмжийн цахим үзэсгэлэнг зохион байгуулах,
• Бизнес эрхлэгч эмэгтэйчүүдэд зориулсан тусгай хөтөлбөр боловсруулж, арга хэмжээ зохион байгуулахад хамтран ажиллана.