МҮХАҮТ-ын Салбар танхимуудыг бэхжүүлэхэд анхаарч ажиллана
Монголын Үндэсний Худалдаа Аж Үйлдвэрийн Танхим нь 21 аймагт салбар Танхимтай бөгөөд салбар танхимууд орон нутагт бизнес, хөрөнгө оруулалтын орчныг сайжруулах, гишүүд, бизнес эрхлэгчдийнхээ үйл ажиллагааг дэмжих, олон талт хамтын ажиллагааг өргөжүүлэн хөгжүүлж, хүртээмжтэй үйлчилгээг үзүүлэхэд анхаарч ажилладаг билээ.
21 аймгийн Салбар танхимын удирдлагуудын тайлангийн хурал болж, салбар танхимууд 2021 оны ажлаа дүгнэж, 2022 онд хийх ажлаа төлөвлөн ярилцлаа. Орон нутагтаа төр-хувийн хэвшлийн түншлэлийг хэрэгжүүлэх, бодлогын өмгөөлөл, жижиг дунд үйлдвэрлэл болон бизнес эрхлэгчдэд зориулсан сургалт, хэлэлцүүлэг, уулзалт, үзэсгэлэн худалдаануудыг амжилттай зохион байгуулж ажиллажээ.
Мөн энэ үеэр Салбар танхимуудын 2021 оны ажлыг дүгнэхэд Сүхбаатар, Дархан-Уул, Баян-Өлгий аймаг дахь салбар танхимууд тэргүүлж, Дархан-Уул аймаг дахь салбар танхимын менежер Б.Ганзориг, Хэнтий аймаг дахь салбар танхимын менежер Д.Даваасүрэн, Орхон аймаг дахь салбар танхимын менежер Б.Хайдав нар шилдэг менежерээр шалгарлаа.
