МҮХАҮТ Еврочембертэй хамтран ЕСБХБанкны санхүүжилттэй төслийг хэрэгжүүлж байна
МҮХАҮТ Еврочембертэй хамтран ЕСБХБанкны санхүүжилттэй “Монголын ЖДҮ эрхлэгчдийг Европын зах зээлд экспорт хийх чадавхыг бэхжүүлэх” төслийг хэрэгжүүлж байна.
Төслийн хүрээнд Төрийн үйлчилгээг цахимжуулах, худалдааны санхүүжилтийг дэмжих дугуй ширээний уулзалт зохион байгууллаа. Уулзалтад Гадаад харилцааны яам, Цахим хөгжил, харилцаа холбооны яам, Монголбанк, Монгол Улсын Хөгжлийн банк, Гаалийн ерөнхий газар, Жижиг, дунд үйлдвэрийг хөгжүүлэх сан, Хаан банк, Төслийн оролцогчид, ЕвроЧамбер, МҮХАҮТ-ын гишүүн компаниуд оролцов.
Төрийн үйлчилгээг цахимжуулах ажлын явц, экспортлогч компаниудад үзүүлж буй үйлчилгээний талаар ярилцаж, Монголбанк, Хөгжлийн банкны бодлогын тэргүүлэх чиглэл, экспортын санхүүжилтийн дэмжлэгийн хэрэгжилтийн талаар мэдээлэл сонслоо.
Мөн энэ үеэр ХААН банк ЖДҮ эрхлэгчдэд зориулсан худалдааны санхүүжилтийн үйлчилгээгээ танилцууллаа.
ЖДҮ-ийг экспортлоход тулгарч буй бэрхшээл, ялангуяа экспортын санхүүжилтийн хүртээмж, түүнийг шийдвэрлэх арга зам зэрэг сэдвээр голчлон ярилцав.