Монгол Ираны цахим бизнес уулзалт зохион байгуулагдлаа
Монгол - Ираны бизнес эрхлэгчдийн уулзалтыг 2022 оны 3 дугаар сарын 10-нд цахим хэлбэрээр зохион байгууллаа. Уулзалтыг МҮХАҮТ-ын талаас Гадаад харилцаа, хамтын ажиллагааны газрын дарга Ц.Гэрэлсайхан, Исламын Бүгд Найрамдах Иран Улсын талаас Алборз мужийн Худалдаа, аж үйлдвэр, уул уурхай, хөдөө аж ахуйн танхимын Гадаад харилцааны газрын дарга Амир Симард нар нээлээ.
Тус уулзалтад Монгол, Ираны 30 гаруй компани үйл ажиллагаагаа танилцуулан оролцлоо. Монголын талаас Мах маркет, Жавхлант шарга уулс, Монгол эм импекс концерн компаниуд үйл ажиллагаагаа танилцуулсан бол Иран Улсын мах, махан бүтээгдэхүүн, гоо сайхны бүтээгдэхүүн, эм, эмнэлгийн тоног төхөөрөмж, малын вакцин үйлдвэрлэгч байгууллагууд үйл ажиллагаагаа танилцуулж, хоёр улсын гадаад худалдаагаар үйл ажиллагаа явуулдаг экспортлогч импортлогч компаниуд харилцан мэдээлэл солилцож, холбоо тогтоолоо.
Монгол Улс Исламын Бүгд Найрамдах Иран Улстай 1971 оноос дипломат харилцаа тогтоож, найрсаг харилцааг хөгжүүлж ирсэн. 2021 онд нийт 438,2 тн, 1,5 сая ам.долларын үнийн дүнтэй хонь, ямааны мах, 44,6 тн буюу 228,1 мянган ам. долларын үнийн дүнтэй хонины ноосон ээрмэл экспортолсон байна. Иран Улсаас нийт 575,5 мянган ам.долларын үнийн дүнтэй тэжээвэр шувууны мах, самар, алим, лийр ба бусад төрлийн жимс, шоколад, хүнсний зүйлс, хивс, нэхмэл дэвсгэр зэрэг төрлийн бараа бүтээгдэхүүн импортолсон байна. Сүүлийн хоёр жил манай улсаас Иран Улс руу хийж буй экспорт өсөж Монголын бизнес эрхлэгчид халал аргаар боловсруулсан махны экспортыг амжилттай эхлүүлээд байгаа.
