Харвардын Менеж-Ментор хөтөлбөрийн төгсөлт боллоо
Монголын Үндэсний Худалдаа Аж Үйлдвэрийн Танхимаас байгууллагын гүйцэтгэх удирдлага, дунд шатны менежерүүд, гарааны бизнес эрхлэгчдэд зориулсан “1000 CEO, 1000 хүчирхэг компани” хөтөлбөрийн хүрээнд Бизнес Академи, Harvard Business Publishing -тай хамтран албан ёсны эрхтэй Harvard ManageMentor хөтөлбөрийг хэрэгжүүлж байна.
МҮХАҮТ-ын дэргэдэх Бизнес академиас хэрэгжүүлж буй Harvard Business Publishing -ний Harvard ManageMentor (Харвард - МенежМентор) Монгол дахь хөтөлбөрийн төгсөлт 2022 оны 3 дугаар сарын 11-нд боллоо.
Дэлхийн нэртэй эксперт, манлайлагчдын хамгийн сүүлийн үеийн чухал санаа, сэтгэлгээ, судалгаа, практикаар батлагдсан энэхүү менежментийн сургалт нь Өөрийгөө удирдах, Бусдыг удирдах, Бизнес удирдах гэсэн үндсэн 3 хэсэгтэй, нийт 42 модуль сэдэвтэй, 5 сарын хугацаанд үргэлжилдэг, онлайнд суурилсан, сүүлийн 20 гаруй жилд тасралтгүй шинэчлэгдэж байгаа сургалтын цогц платформ юм.
Дэлхийн шилдэг боловсролыг эх орондоо, эх хэлээрээ эзэмшиж, монгол менежерүүдэд манлайллын ур чадвар, карьераа өсгөх боломж олгож байгаа энэхүү хөтөлбөрийн хоёр дахь курсийг 70 орчим компанийн 80 гаруй менежер, дунд, түүнээс дээш шатны удирдлагууд төгсч Харвард Бизнес Паблишингийн сертификатыг гардаж аваад байна.
Компанийн гүйцэтгэх удирдлагын багийнхны хувьд тулгараад байгаа сорилтуудыг даван туулах оновчтой шийдвэрүүдийг гаргах, удирдлагын хэв маяг, арга хэлбэрээ өөрчлөх, хамтын ажиллагааг шинэ түвшинд гаргах, тасралтгүй суралцах зэрэг олон зүйлсийг өнөөдрийг хүртэл хийж дадсанаараа бус шинэ хандлагаар, инновацид чиглэсэн арга хэрэгсэлд суралцахад нь туслахад “Harvard ManageMentor” хөтөлбөр чиглүүлэх болно.
Нийт төгсөгчиддөө талархал илэрхийлж, та бүхний цаашдын манлайлалд амжилт хүсье.