"Шинэ сэргэлтийн бодлогыг Аж үйлдвэрийн салбарт эрчимжүүлэх нь" форумд МҮХАҮТ оролцож байна

Монгол Улсад уул уурхайн салбар үүсч хөгжсөний 100 жилийн ойд зориулж “Эрдэнэт үйлдвэр” ТӨҮГ-аас санаачлан “ШИНЭ СЭРГЭЛТИЙН БОДЛОГЫГ АЖ ҮЙЛДВЭРИЙН САЛБАРТ ЭРЧИМЖҮҮЛЭХ НЬ” сэдэвт форумыг Орхон аймагт зохион байгуулж байна. “Шинэ сэргэлтийн бодлого”-ын хүрээнд зохион байгуулж буй тус форумд Сангийн дэд сайд С.Мөнгөнчимэг, Хууль зүй, дотоод хэргийн дэд сайд Б.Солонгоо, Төрийн өмчийн бодлого, зохицуулалтын газрын дарга Б.Цэнгэл, Эрдэнэт үйлдвэр ТӨҮГ-ын Ерөнхий захирал Х.Бадамсүрэн, МҮХАҮТ-ын Ерөнхийлөгч О.Амартүвшин болон албаны, хувийн хэвшлийн төлөөлөл оролцож байна.

МҮХАҮТ-ын Ерөнхийлөгч О.Амартүвшин энэ үеэр хэлсэн үгэндээ Шинэ сэргэлтийн бодлогыг хэрэгжүүлэх эхний зорилт нь аж үйлдвэрийг хөгжүүлэх бөгөөд үүнийг дагаад эрчим хүч, дэд бүтэц, бусад салбар хөгжинө. Шинэ сэргэлтийн бодлогыг аж үйлдвэрийн салбарт хэрхэн эхлүүлэх вэ гэдгийг хамтдаа ярилцаж байгаа нь цаг үеэ олсон чухал зүйл гэдгийг тодотгов.

МҮХАҮТ-ын хийсэн судалгаануудын дүнгээс харахад, Монголын эдийн засгийг хөгжүүлэхийн тулд кластерчилсан байдлаар хөгжлийг томъёолох нь илүү үр дүнтэй гэдгийг МҮХАҮТ-ын Ерөнхийлөгч О.Амартүвшин онцолсон юм.

Мөн "Шинэ сэргэлтийн бодлого" -ын хүрээнд яригдаж буй 100 гаруй томоохон төслүүдийг төр, хувийн хэвшил дангаараа хэрэгжүүлэх боломжгүй. Төр-Хувийн хэвшлийн түншлэл хамтарч, хөрөнгө оруулалтыг татах, хувийн хэвшилд боломж олгох замаар төр эдийн засгийн амжилтад хүрнэ гэдгийг нэмж хэллээ.