МҮХАҮТ-ын дэргэдэх Худалдааны Бодлогын Зөвлөлийн хурал боллоо
МҮХАҮТ-ын дэргэдэх Худалдааны бодлогын зөвлөлийн хурлыг 2022 оны 03 сарын 09-нд зохион байгууллаа. Зөвлөлийн хурлаар 2021 онд худалдааны бодлогын чиглэлээр хийсэн ажлуудыг танилцуулсан ба цаашид зөвлөлөөс хийх үйл ажиллагааны тэргүүлэх чиглэл, ажлуудын талаар хэлэлцлээ. Зөвлөлийн хуралд МҮХАҮТ-аас 2022 онд хийх бодлогын өмгөөллийн үйл ажиллагааны талаар БСГ-ын дарга Ж.Оюунчимэг мэдээлэл хийж оролцлоо.
Хурлаар худалдааны салбарын бодлогыг тодорхойлох, түүний үндсэн дээр байр суурийн баримт бичгүүдийг гаргах нь нэн тэргүүнд шаардлагатай байгааг ярилцаад, энэ чиглэлээр тухайн бизнес эрхлэгчдийн төлөөлөл, салбарын мэргэжилтнүүдийг оролцуулан дэд ажлын хэсэг байгуулан ажиллахад санал нэгдэж, зөвлөлийн гишүүдийн зүгээс идэвх санаачлагатай ажиллахаа илэрхийллээ.
Мөн худалдааны салбарт тулгамдаж буй гол асуудлуудыг хэлэлцэж, эдгээрийг шийдвэрлэхийн тулд төрийн байгууллагуудтай уулзалт, хэлэлцүүлгүүдийг зохион байгуулахаар тогтсон бөгөөд олон улсын төлбөр тооцоо, ялангуяа ОХУ-руу шилжүүлэг хийх, ам.долларын гүйлгээний хязгаарлалт хийж байгаа зэрэг асуудлаар Монгол банктай ойрын үед уулзалт зохион байгуулах нь зүйтэй гэж үзэв.
